2019年十一月初九中晝一點二九分，台北《中時電子報》記者趙婉淳即時新聞報導：（中國）國民黨總統參選人韓國瑜今仔日來到基隆聽在地青年的心聲，講到潛水艦（chiâm-chúi-lām）國造，韓國瑜直剖潛水艦國造是「假議題」，正剾倒削講，設使未來koh講beh建造航空母艦（hâng-khong-bó-lām）、講beh發射登陸月球咧？台灣的國防不如發展細koh奇巧（khá）、有嚇阻作用猶koh行動扭掠（liú-lia̍h）的毒蝦mā khah嬴，一旦hō͘人攻擊，tio̍h hō͘對方受tio̍h某種程度的報復，呼籲政府tio̍h愛撙節家己的氣力。
代表（中國）國民黨參選基隆立委的宋瑋莉議長直剖講，潛水艇國造是假議題，經過了解，發現事實上真正無chit-ê個議題，設使若有我會真歡喜，按呢tio̍h會有一萬個工作機會，但是che是假議題，所以我才會提出精深的計畫kah重開海生館的政見。
接續落去，韓國瑜mā對「國防的潛水艦國造是假議題」表達認同，伊個人mā按呢懷疑，伊剾削政府宣布beh造潛水艦，若是政府宣布beh造航空母艦、beh發射登陸月球咧？真濟代誌攏是無可能的。伊認為政府應該根據台灣工業技術kah工業人才，發展適合的領域，按呢比較khah實際。
初九下晡，軍事專家、台灣戰略學會研究員蘇紫雲表示，美國已經同意技術輸出、台灣mā已經編列法定預算、台船mā正式啟動的情況下，潛水艦國造當然是真實的戰力投資，絕對m̄是假議題，而且以台灣的工業總體實力kah工藝水準，絕對會tàng製造出潛水艦。初九下晡，國防部強調，潛水艦國造是政府重要政策，「家己的國家家己救」，絕對m̄是假議題，而且佇立法院、監察院監督執行下，目前進展順利，頭一台原型艦會tī於2024年下水的期程無變。
初九暗，蔡英文競選辦公室發言人阮昭雄反駁講，潛水艦國造是台灣推動國防自主上重要的一環，m̄-na對咱國水下戰力的建構有幫助，佇整體國防產業的發展上，koh khah是非凡的意義。阮昭雄講，國防自主守護台灣。比征服宇宙koh khah重要，mā koh khah實在。
初十早起，馬英九前總統出席「張老師」50週年年會的時，記者問講「潛水艦國造敢會通？」，馬英九回應講「佇我任內tio̍h有規畫」。
韓國瑜才知影家己失言，緊講「潛水艇國造是假議題」m̄是伊講的，是基隆市宋瑋莉議長講的。「中國時報」電子報應該無可能報導對韓國瑜不利的消息。
咱知，「潛水艇國造」m̄是假議題，顚倒是韓國瑜講假的議題講傷濟！