「pi--」、「pi--」透早傳來一陣一陣啡仔聲，是導護老師kah社區熱心的志工爸爸、志工媽媽，teh指揮學生囝仔過十字路口，習慣性tham頭kā看一下，有影，che是台灣上媠的風景。
武漢肺炎kā全世界舞kah花屑屑，為tio̍h抑制武漢肺炎疫情擴散，真濟國家祭出停課措施。三月三十一，聯合國教科文組織（UNESCO）聲明，全世界已經有185國因為武漢肺炎疫情被迫停課。全世界有將近90%的學生、大約有十六億的學生，受tio̍h停課影響bē-tàng去學校上課。到三月底，干單chhun台灣、新加坡、澳洲的學校猶teh正常上課。三月二八，澳洲宣布各州tī四月底第二學期開學了後，改作線上教學為主，但必要工作者（像講醫護人員等）猶原會tàng送學童去學校面授學習。線上教學狀態猶未訂截止期限。In家己講che是「停課無停學」。新加坡到四月初三，確診人數突破一千人大關。總理李顯龍初三下晡四點半宣布，ùi四月初七起大部分公司改作遠距上班，四月初八起學校全面停課，改作線上教學。算算一下，攏無停課，學生囝仔會tàng去學校讀冊的國家干單chhun台灣niā-niā。
抵抵出現武漢肺炎的時陣，台灣mā真緊張，tī chiah呢緊急的時間內beh照顧全台灣的學生安全，那有hia̍h簡單？原本學校寒假ùi一月二一到二月初十，二月初二，中央流行疫情指揮中心決定，高中職以下學校延後兩禮拜開學；教育部表示，下學期定tī二月二五開學。上課延長到七月十四，按呢tio̍h無影響學生受教的權益。開學hit工，全台灣的老師學生攏有掛嘴掩，全台灣的老師kah校長徛佇學校門口kā學生量體溫、消毒雙手，何等感動人的畫面！
二月二十，教育部公布停課標準，高中以下若1班有1名師生hông列作確診病例，tio̍h全班停課；1個學校有2名以上確診病例，該校tio̍h停課；1鄉鎮市區有三分之一學校全校停課，該鄉鎮市區全部停課。大專院校，有1名師生hō͘中央流行疫情指揮中心列作確診病例，該師生所修所授課程攏tio̍h停課。好佳哉有驚無險，干單三月三十一，台灣師範大學證實有第一名學生確診案例。
外國遠距教學效果事實上kah實體上課有無仝，學生歸工chîn螢幕上課，當然足快疲勞、學習力mā愈來愈bái，而且數位學習的軟體碇體攏總供不應求，而且家長佇厝裡工作tio̍h同時照顧佇厝裡上課的囝仔的壓力。種種因素，催逼各國趕緊腳步想beh重新開始實體上課的模式，但是困難重重。
台灣防疫上早做、全面做、嚴格做。hō͘學校免停課，台灣學生有夠幸福！