五月二十，蔡英文總統連任就職發表演說，koh再以「和平、對等、民主、對話」，kā兩岸關係作定調。伊講，台灣bē接受北京當局以「一國兩制」來矮化台灣，破壞台海的現狀。2016年頭一任總統就職演說，猶有提起：「1992年兩岸兩會秉持相互諒解、求同存異的政治思維，進行溝通協商，達成一寡共同認知kah諒解，我尊重chit-ê歷史事實。」今年，歸氣連「1992」都無愛提起。
上界奇怪的是前總統馬英九，那像蔡英文總統無提起「九二共識」害伊驚一tiô。伊講：蔡政府四年來無承認「九二共識」，一直teh推動「去中國化」kah操弄「仇中意識」，兩岸早tio̍h失去對話基礎，關係陷入谷底。陸委會主委陳明通真客氣，皮皮仔講：「我想歷史已經翻過一頁lò͘。」伊是講時間那像一本冊，一頁一頁直直掀過去，寫佇時間的歷史mā是按呢一頁一頁掀過去。陳明通主委歹勢講：「老人tio̍h是按呢，見講講過去。」台灣師範大學政治研究所范世平教授tio̍h無hiah客氣，伊直剖講：「今仔日九二共識佇台灣無市場，是啥人造成的？是習近平！伊m̄敢罵習近平，罵蔡英文。」范教授認為蔡英文總統大選以817萬票連任成功，表示台灣人對九二共識的否定，馬英九猶koh kā九二共識抱tiâu-tiâu，繼續活佇伊的世界好là！」范教授講，「馬英九若有影hiah呢愛九二共識，伊會使佇伊的額頭刺『九二共識』chit四字！」Hō͘咱想起《聖經》〈申命記〉的一句話：「也tio̍h縛佇你的手做記號，戴佇你兩蕊目睭的中央做記念。」
五月二二，中國人大政協兩會佇北京召開，國務院總理李克強提出政府工作報告，佇涉台部分攏無提起「九二共識」。五月二七人大會閉幕了，李克強總理佇記者會上才講，對台堅持「一個中國」原則、「九二共識」，堅決反對台獨。
2019年三月二五，高雄市長韓國瑜去中國深圳訪問，中國國台辦主任劉結一見面tio̍h伊tio̍h講歡迎兩岸城市「佇堅持九二共識的基礎上」加強合作；韓國瑜講：「九二共識是兩岸關係的定海神針」。Bat看過神怪小說《西遊記》的人攏知影，定海神針原本匟佇東海龍宮，有萬三千重、兩丈外長，hō͘孫悟空硬夯去，伊嫌傷重傷長，直直kā喝hō͘細支，喝kah像棍仔的「如意金箍棒」作武器，伊猶嫌傷大支，喝kah親像一支針se̍h佇耳仔內。兩岸chiah呢嚴肅的問題，竟然tio̍h靠神怪故事講hit號無的來維護。趣味的是定海神針hō͘孫悟空夯去，並無山崩地裂丶海枯石爛，有kah無無差。平平戇的猶有中國國台辦發言人馬曉光，伊tī今年一月二十講，九二共識是兩岸關係和平發展的定海神針，「搖動山簡單，搖動九二共識難」。一陣猶活佇hit號無的「九二共識」箍仔底的人，可憐！