五月初九，菲律賓總統副總統大選，64歲的小馬可仕得tio̍h 56%的選票，贏過對手、現任副總統Lo-bre-to女士得tio̍h 28%的選票。小馬可仕當選下一任菲律賓總統，預定六月三十就任。
Chit位偏名叫作Bongbong的小馬可仕，是菲律賓老獨裁者馬可仕的後生。講起hit-ê老獨裁者，伊ùi 1965年到1986年統治菲律賓二十年久。馬可仕在任期間，菲律賓貧富差距一直擴大，失業率一直升懸，引起反對人士的批判。馬可仕tī 1969年十一月十一總統大選中，以舞弊贏tio̍h選舉、連任成功，成作菲律賓歷史上第一位連任成功的總統。菲律賓佇政治、經濟、社會各方面攏出現混亂。1972年九月二三日宣佈《戒嚴令》，菲律賓全國進入戒嚴，取消1935年憲法中總統任期兩屆的限制。以國家安全作理由掠人、關人，有人長年失蹤，koh khah濟人死佇刑求室kah監獄中。「國際特赦組織」估算，1972年實施戒嚴令致使菲律賓大約有3萬4千外人遭受酷刑，3,240人hông銃殺，7萬人hông掠去關。馬可仕總統掌權21年，搶奪國庫約135億美金（約新台幣3,994億元），當時一般菲國公民的平均年收入1,017美金（約新台幣3萬元）。
Chit遍大選中，小馬可仕替in老父辯解，美化獨裁下的經濟表現，講當年若m̄是因為親民主的反對派阻礙，in老父會tàng kā菲律賓變作一個富裕、運作良好的新加坡模式國家。謳咾in老父是「政治天才」。今仔日小馬可仕的選票會tàng過半數，煞hō͘人懷疑：敢是獨裁者陰魂不散？
出兵侵略烏克蘭的俄羅總統浮丁，懷念帝俄沙皇的輝煌歷史，其實伊是teh謳咾獨裁者，mā希望現代人kah後代人攏會數念、謳咾伊。Che絕對m̄是浮丁teh陷眠。俄羅歷史上第一殘酷的統治者史達林（Stalin）。Tī 1930年代，chit-ê
蘇聯共產黨總書執政下面爆發的「大清洗」，一場政治鎮壓kah迫害運動，包括對蘇聯共產黨內部的清洗kah對無辜人民的迫害。Chit-ê期間，有68萬外人hông銃殺，有137萬外人因為政治原因hông掠去關監坐牢。
Ùi 1922年起統治俄羅斯30年久的史達林，俄羅人敢bē氣敢bē恨chit款的獨裁者？講起來你可能bē相信，照二月初三《信傳媒》的報導，佇俄羅四界攏會tàng看tio̍h史達林的雕像、史達林博物館，mā有號名作「史達林」的城市，當今俄羅第一大的在野黨「俄羅聯邦共產黨」，家己講是「史達林的繼承人」。今仔日，史達林佇俄羅的民調支持率猶有48%。
若有人問你，獨裁者敢會影陰魂不散？你會按怎應？