最近兩年來，美國Trump總統kah伊的政府，佇牽涉tio̍h中國的Twitter
kah新聞稿，定定提起「脫鈎」chit-ê詞。脫鈎佇chia是指美國中國chit兩大經濟體喝beh「切」，一步一步減少互相sio倚靠的關係。本質上來講tio̍h是切斷、取消美國kah中國三十外年來建立的商業關係，具體的操作是採取一切的手法：像講規定美國廠商kā供應鏈ùi中國大陸徙出去，koh再迫佇美國運營的中資公司（像講Tik Tok kah騰訊）用美國股東替換中國股東等。Trump政府認為中國每一年ùi美國偷the̍h美金千外億，美國的技術hông偷the̍h去，真正有牽涉tio̍h國家的安全問題。所以kah中國無脫鈎bē煞得。
有人認為美國kah中國無hiah簡單會脫鈎，tī雙方無絕對有把握進前，美國kah中國攏有可能喝講beh kah對方脫鉤，但是無影會真正全面脫鈎，因為美國做bē到、中國m̄敢做。但是事實上，咱看美國kah中國的關係一直趨向「脫鈎」的方向進行，像講華為公司向美國客戶的供貨會斷，華為mā無法度koh the̍h tio̍h美國的芯片，甚至連台灣的台積電mā會ùi今年九月起對華為斷掉供應芯片，因為台積電的芯片加工工藝有使用大量的美國技術，仝款受tio̍h美國禁令的管制。
中國mā有準備beh kah美國脫鈎，降低對美國科技、市場的倚靠，拍拚宣傳「內循環」－中國領導者鼓勵中國消費者、中國企業，優先選擇本國產品，mài用進口產品，che抵抵有符合in推動真濟年的「中國製造2025」戰略的主要目標，追求科技自主、消除對美國為主的外國科技的依賴性。
美國kah中國佇真濟方面攏teh拚勢脫鈎，像講逐個khah熟似的5G、晶片、稀土等科技方面的脫鈎，煞忽略日常生活中足要緊的「豬肉」。根據聯合國農糧組織（FAO）的統計，2018年全球豬肉生產量約1億1千萬噸，中國是「養豬第一大國」，產量5,404萬噸，佔全球的49.12%。中國mā是「食豬第一大國」，2018年豬肉消費量有5,540萬噸，比產量khah濟136萬噸，若加物流、儲存、生產的損失，照中國農業部估算，2018年中國豬肉欠400萬噸。2019年中國爆發非洲豬瘟，豬肉產量是4,255萬噸，減少22%，今年武漢肺炎koh四界淹大水，豬肉產量koh khah少，今年七月豬肉價數比舊年起86%。中國姑不終tio̍h向世界養豬第二大的美國買豬肉，2018年美國豬肉產量1,194萬噸，消費量835萬噸，猶有359萬噸thang外銷。中國原本beh佇阿根廷投資飼豬，阿根廷人民反對，投資可能bē成。猶原tio̍h向美國買豬肉，美國mā需要賣豬肉。
美國kah中國敢會脫鈎？干單豬肉chit項tio̍h可能脫bē開。