對民主政治上粗淺瞭解的人，攏知影民主政治tio̍h是人民作主人，人民有權利選擇政府的官員－ùi鄉鎮長、縣市長到總統副總統；有權利選民議代表，ùi鄉鎮代表、縣市議員到中央的國會議員，咱台灣叫作立法委員；M̄-nā有權利選in，萬不幸in若做無好，人民無滿意，mā會使tī in任期猶未到進前罷免掉叫in落台，咱台灣人印象應該真深，今年高雄市民才kā韓國瑜市長罷免掉。
人民beh按怎行使in的權利？Tio̍h是用選票來作決定，也就是逐個上愛講的，「用算人頭來代替拍破人頭」的民主方式。
咱看chit遍十一月初三，美國的總統、副總統，kah 100個聯邦參議員中的35個、435個眾議員，11個州選舉州長、有幾州的州參眾議員的改選，hō͘咱看kah真正失望。
大選前一兩工的十一月初一、二，真濟大城市的精品店、百貨公司kah商家因為擔心選舉過了會恐驚會發生暴動，用柴枋kā店門kah見本櫥封掉來做防護。紐約、底特律、芝加哥、洛杉磯等大城市警方mā已經部署koh khah濟的警力預防。佇紐約連上出名的景點「Me-si」（Macy's）百貨公司mā用柴枋封起來。
咱知影「銃」佇美國是自由買賣，會hông煩惱的是，今年買銃的人比往年加出一倍，甚至有消息傳出來講「銃子」賣kah欠貨。是按怎美國人tī大選前買銃買kah親像siáu-ê，真濟人是驚大選了會亂，買銃來保護家己；有《商業內幕》報導講，反映人民擔心Biden若當選會實施嚴格的銃的管制措施。
Chit遍大選參與度誠懸，真濟專家煩惱，有部分政治熱狂份子有可能會因為選舉結果產生對立，甚至發生武力暴動的狀況。「國民衛隊」有答應真濟州的要求，部署3,671名國民兵佇全國各地方待命，負責處理資訊安全防護、投票作業kah應付選後可能產生的動亂。
真無好的是真正有暴力事件發生，美國時間十一月初四猶teh進行開票作業中，美國各州部分城市出現示威、抗議，甚至有示威行動舞歸暗，相當混亂。咱有佇電視新聞報導中看tio̍h過頭激烈的示威者燒美國國旗，一個是發生佇美國西部奧禮岡（Oregon）州的波多蘭市（Portland），一個是發生佇美國東部首都華盛頓特區白宮周邊，有幾個反Trump的團體tī投票日hit暗，聚集佇華府kah白宮外口，舉行八點鐘的演講kah表演ma-lá-son，致使華府有真濟條路攏bē振bē動，mā有kah警察起衝突。
親像按呢，美國算作啥物民主大國？