十一月二二，佇一場名叫作「中國—東協建立對話關係30週年紀念高峰會」的視訊會議，中國國家主席習近平佇高峰會頂面表示：中國「堅決反對霸權主義kah強權政治」。習近平講，「無和平，一切攏免講，中方堅決反對霸權主義kah強權政治，願意kah周邊鄰國長期友好相處，共同維護地區持久和平。」伊強調「中國絶對bē尋求霸權，koh khah bē以大欺小。」
無疑誤一向hông認為對中國相當友好態度的菲律賓總統杜特蒂（Duterte）（Tu thé-teh）當面對中國領導人表示不滿，伊講，伊對最近中國船隻佇南海kah菲律賓船隻發生的爭端，感覺誠「厭惡」。當面kā習近平thuh-臭，完全無hō͘習近平面子。
代誌的發生是按呢：十一月十六有兩隻菲律賓的補給船beh前往阿雲金礁（中文名仁愛礁）的補給行動中，遭受tio̍h三隻中國海警船的閘路阻擾koh發射水砲，封鎖兩隻菲律賓補給船的去路。
十一月十八，菲律賓外交部長駱辛（Locsin）佇一份聲明中，以「上強烈的語詞」向中國駐馬尼拉大使黃溪連kah中國外交部表達「憤怒、譴責kah抗議」，而且提醒中國，菲律賓的船隻是有受美菲《共同防禦條約》的保護。不過，中國外交部表示，中國海警船的行動是「依法執行公務，維護中國領土主權kah海上秩序」。
十一月十九，美國警告中國，表示北京「不應該干涉菲律賓佇in國專屬經濟區內的合法活動」。中國按呢的行為，是直接威脅chit陣地區和平kah穩定的情勢升級，美國徛佇馬尼拉chit旁。
十一月二一，菲律賓國防部長羅連查那（Lorenzana）表示，本週開始會繼續為駐紮佇南海環礁頂面的軍隊恢復軍事補給任務。
佇十一月二二視訊會議中，菲律賓總統杜特蒂（Tu thé-teh）呼籲中國tio̍h尊重1982年的《聯合國海洋法公約》kah 2016年的海牙仲裁裁決。伊講，「咱tio̍h充分利用chiah-ê法律工具，才有可能確保南海是一個和平、穩定kah繁榮之海，」
咱知影因為中國kah菲律賓佇南海有爭執衝突，2013年菲律賓向海牙常設仲裁法庭提出要求仲裁。2016年七月對南海仲裁案作出的裁決中，會使講全盤認同菲律賓提出的訴求，認為佇《聯合國海洋法公約》下面，中國bē使講照「九段線」的歷史性權利，歸個南海是中國的。中國拒絶承認chit-ê裁決。