2021年十二月初九，中國陝西省西安市（古都名叫作長安）開始爆發最新一波的武漢肺炎（COVID-19），十二月中確診數一直增加，十二月二五開始連續七工每工攏有150個以上的確診病例。到年底十二月三十一為止已經封城十工，十二月三十一chit工，全中國新增加231個確診病例，其中175例屬本土個案，干單一個西安市tio̍h佔174例。疫情那像無hiah快煞。
Ùi十二月二三封城以來，「物資配送」tio̍h一直是一個大問題，khah早tio̍h有真濟西安市民piak料講「當地菜價一直起、起kah買bē tio̍h菜，若按呢落去差不多tio̍h吊鼎。」若是當地住戶社區管理員通常會有「買菜群組」，統一配送到厝的服務。但是有真濟外地來西安工作租厝的人，根本無管道thang採購食物。十二月二六，西安市宣佈進一步升級管控措施，要求所有居民除了去做核酸採樣以外，命令所有的人「足不出戶」tio̍h是攏總bē使出門；各大專院校在校學生mā攏bē使離開宿舍。
全中國的人攏知影西安疫情真嚴峻，干單tòa佇西安的人才知影西安teh鬧飢荒。最近有出現超級市場搶買物資的亂象。十二月三十，中國商務部發言人高峰表示，目前西安市生活必需品市場供應總量充足。高峰講，chit輪疫情發生了後，商務部第一時間tio̍h啟動聯保聯供機制，組織安徽、山東、廣西、海南、四川、雲南等六省份，圍佇陝西四箍圍搭建了七省保證供應平台，協調跨省生活必需品運輸，優化生活物資供應渠道。針對前期出現的生活必需品供應問題，西安市商務局已經採取積極措施，ùi多方面努力協調解決。
十二月三十一暗、2021年最後的一暝，西安市雁塔區南窯頭村有一個查埔人因為枵kah擋bē-tiâu，出門去買饅頭，無疑誤轉來的時佇大樓門口抵tio̍h防疫人員，罵伊「想beh chhōe死是boh？」Kā伊的手機仔搶去了後，四個防疫人員才出手kā拍、起腳kā chàm。Chit-ê枵過飢的查埔人根本無力thang抵抗，in大大力kā伊捒一下，害伊倒退幾仔步，手裡的饅頭攏總落落佇土腳。有一位微博帳號「關注三秦」的人kā chit段經過翕作影片佇網路頂面播出。引起真濟人的憤慨kah同情。「關注三秦」叫觀眾tio̍h「ná看ná珍惜」，意思是講m̄知tang時仔chit支影片tio̍h可能m̄知啥物原因hông刪除掉。
Chiah呢無人性的代誌，竟然會佇文化古都西安發生。實在會hông驚、會hông受氣；佇台灣竟然有中國國民黨chit款黨，主張台灣tio̍h kah chit種無人性的國家統一。實在會hông笑、會hông搖頭。
借問咧，腹肚枵是犯tio̍h啥物罪？