英國因為下院（有的國家叫作眾議院）議員54位（超過下院保守黨議員總數的15%），向「1922委員會」上書，以無記名方式對黨魁作信任投票，結果是黨魁鐘孫無hông信任，所以tio̍h重選黨魁。第一輪黨魁投票，每一位參選人至少tio̍h有20位保守黨下院議員提名，七月十三頭一輪投票，得票30票以下的拍掉。第二輪開始，每一輪得票上少的tio̍h拍掉，最後chhun兩位，是原本財政大臣Su-nakuh（Rishi Sunak）kah原本外交大臣Chhuah-suh女士（Liz Truss）。佇議會5輪的投票中，Su-nakuh攏贏Chhuah-suh 10%左右，但是最後決定是九月初二，由全體16萬名保守黨黨員一人一票以郵遞投票方式，得票khah濟的候選人當選新黨魁。因為下院保守黨是多數黨，所以新一任的保守黨黨魁自然tio̍h是英國新首相，siáng是新首相，預定九月初五公佈，九月初六就任。
Chit中間的民意調查，顚倒是Chhuah-suh的聲勢愈來愈好，甚至贏過Su-nakuh愈來愈濟。上主要的原因是因為北京佇新疆kah香港的強硬政策、對台灣的威脅、對澳洲發動的貿易制裁、對英國議員的制裁、kah戰狼外交的行為，佇英國kah真濟民主國家民間kah政界改變了對中國的態度。2010年至2016年的英國Kha-mé-lo͘ń（David Cameron）首相時期，伊所講的：「英國是中國佇西方上蓋好的同伴」hit-ê時代已經一去無回頭ah！
Chhuah-suh佇民意調查khah有贏面，是因為伊對中國kah俄羅態度誠嚴厲。伊bat講，自由世界應該ùi俄羅入侵烏克蘭吸取教訓，聯手協助台灣會tàng自衛，koh呼籲七大工業國集團（G7）化身「經濟北約」，tio̍h對付中國威脅，甚至唱聲tio̍h制裁中國。伊批評Su-nakuh對中國軟弱。舊年Su-nakuh講，改善英中貿易關係是英國目前上要緊的，致使hông看作是對中溫和派。
九月初二選舉前，猶有幾場的電視辯論，雙方攏利用機會拼勢作最後的衝刺。Chhuah-suh講，咱對中國tio̍h採取上強硬的態度，無論是kah咱“G7”集團同伴做夥建立替代中國「一帶一路」的方案，抑是明確做到台灣佇面對中國侵犯的時有法度自衛。看風勢，Su-nakuh佇電視辯論的時，mā緊下重鹹，連「中國無應該霸凌包括台灣在內的隔壁國」chit款話tio̍h喝出嘴，可見伊偌呢tio̍h急．伊koh講，中國是本世紀對英國kah全球安全、繁榮「上大的威脅」。伊講，英國的孔子學院攏是Chhuah-suh擔任教育大臣的時批准設立的，伊若當選beh kā境內三十間孔子學院攏關掉！
英國首相選舉政見，煞變作反中言論比賽，實在真趣味！