「武漢肺炎」疫情繼續teh燒，美國前ā發布疫情預測，講台灣擴散風險排第二名，但是目前台灣累積確診十八例，比日本、韓國、新加坡等國家攏khah少。Chit-ê時陣出名的電視、電台節目主持人趙少康二月初十表示，台灣防疫做得好，是因為總統「蔡英文真的是運氣好」。頂頂下下為tio̍h武漢肺炎疫情拚kah無暝無日的公務員攏無功勞？引起真濟人的不滿，寫文章抑是佇電視、電台節目中批評伊。其實，趙少康講的話並m̄是完全錯誤。
咱看2018年十一月二四台灣九合一大選，民進黨江山去一半，逐個mā講民進黨無救ah，蔡文總統辭掉兼任的民進黨主席，hō͘黨主席卓榮泰專心拚黨務，箍一陣少年人落去拚；蔡英文運氣好，有智慧拜託蘇貞昌擔任行政院長，歸個行政團隊足拚勢，行政院長蘇貞昌拚kah嘴歪去。成績拚kah有看tio̍h，像講三百年來第一政府kā人民減稅，台灣股市拚起去一萬一千點、是馬英九總統執政八年拚bē到的，2019年台灣以成長率2.91%的成績拍敗韓國、香港、新加坡，成作亞洲四小龍的頭名。上要緊的是2020年一月十一，有817萬有智慧的台灣人支持伊連任作總統、得票率57.13%，兩項攏是歷史上懸的紀錄。因為蔡英文總統有誠心對待台灣chit塊土地kah頂面的人，所以伊的運氣tio̍h會真好。
Chit遍中國「武漢肺炎」抵仔開紿，武漢確診才198例、3個人死亡，一月二十咱tio̍h成立三級中央流行疫情指揮中心，由衛服部疾管署長周志浩擔任指揮官。因為武漢肺炎疫情繼續擴大，一月二三，中央流行疫情指揮中心宣布今仔日起kā疫情等級提升到第二級，由衛生福利部陳時中部長擔任指揮官。續落去，每工有幾遍記者會，除了陳時中部長、擔任執行官的疾管署長周志浩以外，每遍攏有相關無仝部會的主管在座，有時會看tio̍h教育部、經濟部、勞動部，內政部、陸委會的官員報告kah in部會相關的最新發展kah決定，隨時hō͘全國人民知影。
另外一旁，二月十三行政院長蘇貞昌主持行政院院會的時，決定交通部提報針對觀光業kah交通運輸業、經濟部針等內需型產業、農委會針對農業所提紓困等方案，三大類總金額是424.8億。
人若緊張無智慧無用心，有可能tio̍h會講戇話、做出錯誤的決定，真濟人攏足愛the̍h起2003年SARS流行的時，當時的台北市長馬英九倉皇（chhong-pōng）kā市立和平病院「封院」，造成悲慘的局面。人若有智慧、有認真、有愛心teh拚，天會幫贊hiah-ê家己認真teh拚的人，蔡英文總統正是得tio̍h天惜的人。
Ùi chit點來看，蔡英文總統真正運氣好！