二月十六，「台灣抗Malaria之父」、昆蟲學家kah公共衛生專家連日清教授離開世間，雖然有九十六的懸歲壽，總是台灣人mā攏誠m̄甘。因為伊解救台灣人脫離Malaria（Má-la-li-á）的苦海。
第二次世界大戰後初期，台灣人口大約有600萬，當時tio̍h過Malaria的人有120萬，差不多五個人tio̍h有一個人tio̍h過。Hit=ê時陣的台灣人干單聽tio̍h
Malaria to̍h會phī-phī-chhoah，因為Malaria若tio̍h tio̍h，發燒起來會tàng燒到四十度，有細漢囝仔不幸頭殼燒歹去，畏寒起來兩領棉被mā蓋bē燒，每工差不多仝的時間發作，按呢發燒畏寒相輪替，大約有歸點鐘的時間，所以永過的台灣人kā叫作「寒熱仔」。差不多一禮拜十工才會消退。有的人每一年來一遍，實在真痛苦。那像到今仔日猶無特效藥。
專門研究「蠓仔」的連日清教授chhōa一個由伊的同事kah學生組成的研究團隊，ùi實驗室到台灣全省各所在去掠蠓、研究蠓，koh借助當時上厲害的殺蟲劑“DDT”kā Malaria蠓仔撲滅kah一隻都無留。1965年八月，經過「世界衛生組織」（WHO）專家組成的鑑定隊來台灣實地考察，鑑定台灣已經達到該組織世界Malaria根除標準，tī仝一年十二月初四發hō͘台灣地區Malaria根除證明文件，同時向全世界宣告chit-ê好消息。到今（taⁿ）全世界mā猶真少國家有chit種成績。咱台灣人是按怎會特別感謝連日清教授？因為到今仔日全世界每年猶有三至五億Malaria的患者，有一百萬至三百萬人tio̍h Malaria死亡，其中上濟的是兒童。
1981年，外交部拜託連日清教授chhōa一陣人去南美洲的玻利美亞（Bolivia）擔任昆蟲醫學技術團團長，協助玻利美亞進行Malaria防治，一直至1985年七月十一，玻利美亞kah咱國斷交為止。
2003年，外交部真歹勢koh拜託七十六歲的連日清教授，去西非的一個小國聖多猛（São Tomé e Príncipe）進行「蠓仔外交」，推廣「臺灣經驗」，協助該國抗Malaria。幫助聖國kā Malaria發生率ùi 2003年的50%，大大落到2015年的1.01%，協助聖國脫離Malaria的威脅。雖然2016年十二月二一聖多猛kah咱國斷交，但是聖國人民一直感念台灣的幫忙。
2007年，衛生署頒發hō͘伊一等衛生獎章的時，連日清教授誠歡喜表示：「若是健康許可，我願意繼續幫助koh khah濟國家對抗Malaria！」
連日清教授，台灣人永遠感謝你、數念你！