七月初六，佇電視台政治性談話節目中，聽tio̍h台北市議員王世堅批評台北市長柯文哲有三個毛病。第三個毛病是：「愛亂講話」，伊講柯市長講，第七類疫苗注射是國家特權疫苗。其實注疫苗分級分類，是照高風險高危險族群來注，有真濟第一線工作人員佇風險中工作，卻hō͘柯市長烏白罵講攏是特權疫苗。王世堅mā分析講，柯文哲市長愛亂講話，是因為beh轉移焦點。
台北市出一個愛亂講話的市長嫌無夠，市長夫人家己走來鬥。
七月二四，各新聞媒體攏有報導講：恬恬無出聲teh beh兩個月ah！陳佩琪忽然間爆料講：已經幾禮拜無kah柯文哲講話。
新北市侯友宜市長夫人啥物大名？桃園市鄭文燦市長夫人啥物大名？台南市黃偉哲市長夫人啥物大名？高雄市陳其邁市長夫人啥物大名？相信in本市kah in khah熟似的市民以外，知影的人無濟。Koh khah m̄-bat聽講tio̍h叼一位市長夫人對市政發表高論，甚至隨便批評中央。
Mài講佇台北市，逐個市民攏知影陳佩琪是台北市柯文哲市長夫人，相信全台灣有一半以上的人mā攏知影台北市柯文哲市長夫人是陳佩琪，頂港有出名、下港有名聲的市長夫人，對柯文哲兩年後beh選總統是m̄是有幫助，咱m̄知。因為出名kah名聲有好歹兩種。
Chit遍陳佩琪是講啥大代誌？原來七月二四透早三點三十九分伊佇面冊頂面寫講：今仔日聽講台北市有chhun落來的Moderna疫苗會hông收轉去中央。聽tio̍h chit-ê消息，實在忍bē-tiâu想beh寫一篇「一個醫生的殘劑人生」， 因為殘劑影響tio̍h我的工作kah家庭，我已經幾禮拜無kah阮翁婿講話ah …。有一工舞kah頭殼beh piak去（因為我有真大的腦囊腫，水積濟tio̍h會頭殼疼），轉去家裡想beh對翁婿怨歎兩句，伊竟然講伊無想beh聽…。」
舊年五月三十一，台北市柯文哲市長夫人陳佩琪，佇臉書頂面發文，批評衛福部講有電郵警告世衛新冠肺炎疫情，是「硬拗」。第二工，台北市議員簡舒培佇台北市議會市政總質詢的時批評陳佩琪莫名其妙，要求陳佩琪mài koh按呢烏白發言，影響台北市政；柯市長表示「會叫伊減講話，已經kā伊講過真濟遍ah。」Chiah呢關心家事、市事、國家事，koh愛發表意見的人，你會tàng kā伊按怎？柯市長都bē-tàng，咱那會tàng按怎？
咱想bē曉的是，世間那有chiah呢厚話的市長夫人？若萬不幸hō͘ chit款人作咱的總統夫人，台灣人干單會tàng逐工祈禱：天佑台灣。