六月三十，中國政府公布由中國人大常委會所制定的《港版國安法》正式生效。中國違背《中英聯合聲明》的國際條約義務，侵害香港人的權利kah自由，對香港實行殖民統治二十外年，通過《港版國安法》，正式宣告香港進入「一國一制」。條文內容設陷阱來治人的罪，而且設有鋪天蓋地的管轄權。
干單看《港版國安法》第三十八條kah第三十六條，你腳底tio̍h冷去ah！第三十八條講，無香港特別行政區永久性居民身份的人，意思講「m̄是香港人」，雖然佇香港以外的所在，對香港做出《港版國安法》內底所提tio̍h的危害國安行為，mā適用本法；第三十六條講，任何人佇香港實施本法規定的犯罪，犯罪行為抑是結果只要有一項佇香港發生，包含佇香港註冊的船隻抑是飛機頂頭，攏適用本法。意思是講無管啥物人，可能佇中國大陸kah香港以外的所在犯tio̍h chit-ê法，若有入境香港、抑是有坐tio̍h香港船隻抑是飛機、抑是佇香港轉機，攏有可能會hông掠去。設使一個美國人佇美國國內喝台灣獨立、抑是支持香港民主化，mā已經犯tio̍h《港版國安法》。總講一句，無論你是不是香港人、mā無論你是m̄是佇香港，只要in認為你犯tio̍h《港版國安法》，tio̍h有可能hông認定是嫌犯，若有入境香港抑是中國tio̍h有可能hông in掠去。Chit-ê《港版國安法》會使講是管到全世界所有的人。Che完全違背全世界法律的精神，以人來講，法律管轄家己國的人，以地來講，法律管伊管轄內的地點所發生的。《港版國安法》管轄範圍包天包海包全世界，管轄的人包括全世界任何國家的人。Che是啥法律？
七月初五，馬英九前總統出席中國國民黨革命實踐研究院民主實踐營講習班結業式，伊佇會中講話，m̄-nā無讉責中國政府半句，顚倒講台灣所訂的「國安五法」、「反滲透法」，bē輸《港版國安法》，攏是侵犯人權。
七月初九，陸委會副主委兼發言人邱垂正，佇例行記者會強調講，咱國的「國安五法」是透過民主立法的程序，《港版國安法》完全閃過香港的立法機構，無民意基礎；是人民會因為言論煞hông定罪的法令，而且管轄權會使講是無所不在、無所不包。兩個完全無仝款，一下tio̍h看kah真清楚，逐個攏會tàng了解。咱台灣的「國安五法」kah「反滲透法」是佇必要的範圍內底強化民主防衛，是憲政體制的正常運作，「反滲透法」是針對法律原本tio̍h禁止的不法行為，相關規範並無限制憲法保障人民言論kah表意自由。Chit幾年真濟民主國家mā攏有採取法治作為，來防範境外勢力的不法滲透kah破壞。
好好人無可能胡言亂語。馬英九前總統m̄知有發燒無？燒kah頭殼歹去？