2018年高雄市長選舉，有人認為民進黨市長做傷久tio̍h換黨做看覓，有人相信韓國瑜的嘴花，形成一股那像大風湧的「韓粉」，有影kā高雄市舞kah滾
Chhiāng-chhiāng，真濟人煞無思考tio̍h選一個對高雄有深入瞭解、有能力有熱誠beh做代誌的人來擔任市長，干單聽tio̍h好聽的口號tio̍h心花開，致使韓國瑜得tio̍h 89萬2,545票、得票率53.87%，陳其邁得74萬2,239票、得票率才44.18%。
韓國瑜市長就任了後，拚去香港拜訪「中聯辦」－中共佇香港的太上皇，伊選舉所開的支票無落實，m̄-nā市政無半撇，做無一年市長tio̍h無心高雄市政，煞食碗內看碗外，決定beh爭取代表中國國民黨競選中華民國總統，講伊若當選總統，會kā總統府徙來高雄、繼續照顧高雄。Hō͘高雄市民真失望koh真受氣，有心的人tio̍h落去計畫籌備，等韓國瑜市長做滿一年tio̍h 開始連署罷免。韓國瑜眠夢mā bē夢tio̍h 今年（2020）一月十一總統大選，伊想講穩tak-tak的高雄市，會輸民進黨的蔡英文48萬6,725票，才得tio̍h 32.63%的票niā-niā，hō͘蔡英文得tio̍h高雄市選舉史上最高票109萬7,621票。佇罷韓四君子拚勢之下，歸個高雄市攏動起來，六月初六罷免韓國瑜市長投票，竟然有93萬9,090票、超過97%同意，比伊當選市長的票加4萬6,545票。所以八月十五才tio̍h補選高雄市長。
民進黨推出上適當的人選陳其邁，伊決定佇叼位跋倒tio̍h佇叼位peh起來，決心beh用干單chhun落來的兩年拚四年的工課。高雄市民還伊一個溫暖，八月十五的補選，因為投票率才41.83%，所以陳其邁才the̍h tio̍h 67萬1,804票，但是伊的得票率是高雄自治史上懸的70.03%。
真濟人攏想bē曉，是按怎中國國民黨會去選一個人笑講是「韓國瑜2.0」的李眉蓁，來作chit遍高雄市長補選的候選人咧？李眉蓁無論是講話、政見的內容、無理由硬拗的方式，會使講ká-ná是韓國瑜。韓國瑜tú-chiah hông罷免掉，叫一個伊的化身出來競選，未選tio̍h註定輸的。八月十四暗「選前之夜」，中國國民黨動員前總統馬英九、前副總統吳敦義、前新北市長朱立倫、黨主席江啟臣、前立法院長王金平、前高雄市長韓國瑜等黨內大腳出動，mā無法度救李眉蓁守tiâu「333防線」－tio̍h是得票率3成、得票數30萬票、輸陳其邁30萬票以內。選舉結果是：得票率25.9%、得票數24萬8,478票、輸陳其邁42萬3,326票。
今年，全台灣的人攏干單一遍選舉，tio̍h是總統副總統kah立法委員大選，獨獨高雄市民tio̍h加選兩遍，一遍罷免市長韓國瑜，罷免有過，tio̍h koh加chit遍的市長補選。一年選三遍舉。高雄人，hō͘恁真辛苦！