中國國民黨射出「迴力鏢」！

中國國民黨射出「迴力鏢」！

中國國民黨政治人物kah部分媒體人，一再質疑注疫苗第二類內底的第6項kah第7項「維持防疫體系運作的中央政府kah地方政府重要官員」的施打情形，罵講是「人數膨脹」、「親屬特權」，罵講chiah-ê中央大官無beh注高端疫苗，反轉kah老百姓搶進口疫苗、搶人民的疫苗。中國國民黨立委林奕華表示，衛福部的標準hō͘人真歹接受，in用家己權力的方便，beh hō͘啥人注疫苗tio̍h hō͘啥人注疫苗，莫怪第二類的人員會ùi原來預定的九萬外人膨到二十外萬人，中央流行疫情指揮中心敢免hō͘人民一個交代？

八月三十，有記者公開問「中央流行疫情指揮中心」指揮官陳時中，到底實在的情形是按怎？伊講：第二類內底的第6項kah第7項，維持防疫體系運作的中央kah地方官員攏總有兩萬六千人注疫苗。伊講：中央官員m̄是上濟。中央政府重要官員造冊1,710人，其中注第一劑的有1,692人、注第二劑的有925人；維持防疫體系運作的地方政府重要官員造冊的有28,794人，注第一劑的有24,793人、已經注第二劑的有5,886人。

　　有記者去挖（ó͘）資料發現，全國16縣市提報「地方官員」名冊中，藍營執政的4個縣市，提報人數tio̍h差不多佔第二類第七項維持防疫體系運作地方官員總數的77.4％。

八月三十一，新聞報導講，佇地方官員造冊中，人數前4名分別是彰化縣有8,238人（佔27%），雲林縣有5,499人（佔18%），南投縣有4,710人（佔15%），嘉義市有3,842人（佔12%），攏是藍營執政的縣市。

　　南投縣那會hiah濟濟到變全國第三？縣長林明溱講，因為kā送造冊名單的鄰長、戶政人員kah防疫志工攏列作維持防疫體系運作的重要地方官員。民進黨立法委員蔡易餘用嘉義市作例講，嘉義市申報的第二類第七項重要地方官員有3,842人，咱看人口數是嘉義市2倍的嘉義縣，干單提報不到150人。伊笑講「戰鬥藍」tio̍h那像一個射「迴力鏢」的人，射出去飛倒轉來拍家己。

　　九月初一早起，中國國民黨立法院黨團召開記者會，總召費源泰反擊民進黨立委蔡易餘講，「Mài烏白潑屎」，而且向指揮中心喝聲，要求公布「第二類、第七項到底有啥款的人，無管叼一黨執政的縣市，全部公布好boh？」

　　按呢敢好？所有的名單公布出來，中國國民黨的面beh夯去叼位？費源泰真正m̄知影「迴力鏢」是啥？費源泰恁tio̍h緊閃khah開、抑是緊小khû落去一下，恁射出去的「迴力鏢」teh beh se̍h倒轉來彈tio̍h恁家己ah！