九月二五，中國國民黨改選黨主席，總選舉人數是37萬711人，開票開出18萬7,998票，有效票數18萬6,018票，總投票率是50.71％。連海外投票，朱立倫得tio̍h 8萬5,618票、得票率45.2%，成作新科的中國國民黨主席。朱立倫到底是一個啥物款的人，咱講khah bē準，咱來聽chit遍出來選黨主席的竸爭對手、家己的同志按怎講伊。
九月十六，朱立倫講：「民進黨上希望中國國民黨選出一個上弱（lám）、上極端的黨主席」，hông解讀是teh暗中指另外一位候選人張亞中。九月十七早起，張亞中接受媒體聯訪的時表示，2016年總統大選，朱立倫輸300外萬票，得票率干單31.04%。「請問按呢敢猶無夠弱（lám）？」。
九月十九，佇政見會頂面，現任黨主席江啟臣，左旁批張亞中不務實、正旁拍朱立倫無老實。江啟臣講：In兩個內鬥m̄好，黨內互鬥是亡黨的亂源。
九月十九，佇台中政見發表會中，張亞中評批朱立倫講伊是紅統、武統，卻提bē出證據，是「非常非常LOW（低級）。」
九月十九暗，中國國民黨主席候選人張亞中發出聲明，砲轟另外一位候選人朱立倫攻擊伊是「紅統」、「極端」，會造成「黨內分裂」，koh祭出「棄保論」kah「亡黨論」來恐嚇黨員，che是「踐（thún）踏同志尊嚴」、「上蓋無格」的作法，koh khah是一種「為tio̍h選舉，無惜tio̍h打擊同志的可悲行為」。
九月十九，佇台中市舉辦中國國民黨主席政見說明會，黨主席參選人張亞中佇說明會進前接受媒體採訪的時表示，中國國民黨40歲以下的青年比率無3%，若koh照按呢落去，中國國民黨可能tio̍h會絕子絕孫。
九月二三，黨主席江啟臣接受媒體訪問的時講：只要是愛黨、對黨有感情，無希望中國國民黨「絕子絕孫」的人，應該攏會願意投票支持我。但是咱看chit遍中國國民黨主席選舉，佇18萬8,486張有效選票內底，江啟臣才the̍h得3萬6,099票、約19.15% niā=niā，按呢是m̄是講，今仔日出來選舉的中國國民黨黨員內底，有80.85%的黨員現現看中國國民黨會絕子絕孫，目睭mā連nih一下都無。可見中國國民黨員m̄驚中國國民黨絕子絕孫的相當濟。敢會舞kah中國國民黨無尾去？咱慢慢仔kā看。
九月十八下晡，舉行中國國民黨主席選舉電視辯論會，江啟臣有提問：黨內互相拍kah chiah嚴重，若當選，beh按怎團結黨？咱借江啟臣chit句話，請教新科黨主席朱立倫先生。