美國Trump總統翁某佇in上親近身邊幕僚希克斯（Hope Hicks），確診tio̍h武漢肺炎了後，Trump總統翁某接受採檢，十月初一證實雙雙確診。白宮國家安全顧問胡不連（Robert O'Brien）七月mā bat確診過，伊是Trump團隊確診的上高層級官員。美國總統Trump m̄是第一個tio̍h鏢的國家元首。
加拿大總理拄汝道（Trudeau）夫人，三月ùi英國轉去了後身體無爽快，採檢結果是陽性，全家隔離兩禮拜。三月二七，五十五歲的英國首相將孫（Johnson）是主要國家領導者第一個確診的例。四月十三出院，感謝兩位醫生二四點鐘拚命醫療照顧伊。六月十七，咱國友邦宏柱拉斯耶蘭德滋總統確診。六月中旬，多明尼加總統候選人阿比那德（Luis Abinader）確診，大選前自我隔離，七月初五大選當選。七月初七，巴西總統玻索納洛（Jair Bolsonaro）證實感染tio̍h武漢肺炎，確診兩禮拜後採檢結果轉作陰性。七月初九，玻利微亞臨時總統艾奶滋女士確診。七月二九，白俄羅總統呂卡申科（Lukashenko）確診。九月十八，瓜地馬拉總統謝馬太（Giammattei）確診。九月二九，印度副總統奈株（Naidu）確診，是無症頭患者，健康狀況良好，目前佇厝裡自我隔離。
佇幾位確診的政治領袖內底，英國首相將孫bat講冠狀病毒bē阻礙伊繼續kah人握手。伊佇厝裡自主隔離，發燒十工無退熱，送入加護病房治療。巴西總統玻索納洛幾遍攏講疫情無啥，伊講he是「小小流行性感冒」，伊bat反對封鎖，認為封鎖會破壞經濟。伊tio̍h大大宣傳猶未證明有效的má-la-li-á治療用藥奎寧對武漢肺炎有治療效果。攏m̄是好模範。
上蓋hông bē謳咾的是美國Trump總統，伊一直講武漢肺炎是一般的感冒。伊的血氧濃度bat降到93%，世界衛生組織（WHO）抑是醫生專家，攏認為伊是重症患者，那會使tòa加護病房三工tio̍h趕緊出院，至少mā tio̍h tòa一禮拜十工。十月初五伊出院轉去到白宮第一項動作tio̍h是kā嘴掩剥掉，聽取簡報，破壞隔離的規定。莫怪會hō͘美國媒體罵講：小小一個白宮，十工內有十五位高層頭人確診，比人口兩千三百萬的台灣十工確診的人數koh khah濟，何況台灣確診的攏是境外移入的。白宮高層頭人包括白宮顧問米勒（Stephen Miller）、米勒的牽手是副總統偏斯（Mike Pence）的發言人，伊五月確診。Trump chit款的總統！
病毒無認人，無管你是國家領導者抑是王公貴族，無管你是身價幾千億的好額人，無管你是擔蔥賣菜的平民百姓，病毒平等對待每一個人。
佇病毒頭前，無人會使鐵齒，人人攏tio̍h謙卑！ (201009)