國際疫情持續嚴峻，各國為tio̍h防疫安全，對船員上岸交換攏採取嚴格的邊境管制，目前全世界大約有25萬名船員留佇海上無法度順利返去家己的故鄉，聯合國kah國際海事組織等國際組織攏有對che表示關心。
駐台北印尼經濟貿易代表處（IETO）有對咱外交部反應，講佇台灣附近海域有一隻外國籍的船隻，船頂有真濟印尼籍船員雖然契約已經到期，但是因為船東kah船旗國bē-tàng處理好勢，致使船員無法度轉去印尼，已經對in的身心健康造成負面影響。印尼代表處mā瞭解台灣為tio̍h確保邊境防疫安全的處境，台灣干單有開放國籍船隻kah國人投資經營的船隻頂面的外籍船員佇台灣進行船員交換。但是印尼代表處猶原期待台灣政府基於人道協助的立場，會tàng幫助印尼船員轉去故鄉。
咱國外交部接tio̍h通報了後，相當重視船員的現況kah權益，隨時召開跨部會專案協調會議，釐清相關權責了後研擬協助方案。根據「海事勞工國際公約」等相關規範，外籍船隻頂面的外籍船員轉去in國事宜屬於船東、船旗國kah船員國的責任。咱國對外籍船隻頂面的外籍船員無管轄權，但是基於保障國際人權kah落實人道援助精神，咱國政府tī疫情嚴峻、防疫量能有限的條件之下，猶原伸手全力協助留佇海上已經真久的印尼籍船員轉去in國。
經過交通部航港局kah外交部合作規劃，政府各相關部門kah外籍船隻佇台灣的船務代理業者多次協商，佇兼顧tio̍h邊境防疫安全kah人道問題的原則之下，擬定專案。Chit-ê專案先進行安全查驗了後，才以「過境不入境」的「防疫通道」方式上岸，每一位攏有穿防護衣帽，才照順序坐巴士前往小港國際機場坐飛機，咱政府有動員百外名工作人員，順利協助105名印尼籍船員kah 16名留佇台灣的印尼僑民，tī八月二十暗時十一點坐印尼政府安排的專機轉去印尼。中央流行疫情指揮中心副指揮官陳宗彥有佇現場視察遣返作業情形。
台灣kah印尼合作執行chit-ê專案，攏同意雙方應該針對船員聘僱kah相關議題進行對話，以提升船員權益。未來台灣相關部門mā會依法透過港口國管制、登檢、驅離等作法，維護台灣周邊海域的秩序kah安寧，同時確保外籍船員佇外國籍船隻頂面的權利，好好做一個國際社會負責任成員的義務。
Chit遍順利幫助印尼漂流佇海上的百外名船員順利轉去印尼，hō͘ 咱想起舊年咱kā家己生產的嘴掩贈送hō͘足需要的世界各國，咱講“Taiwan Can Help”「台灣會tàng幫助」，chit句話chit-má mā是真的！