2021年十二月二六新聞報導，資深藝人方芳過去佇台灣mā算是綜藝界的一姊。幾工前伊佇社群頂面歡喜報hō͘逐個知影一個好消息,，tio̍h是伊已經領tio̍h中國公民身分證，引起網友熱烈討論。一個台灣人歡喜beh做美國人、德國人抑是日本人，是伊選擇的自由。伊若順利the̍h tio̍h伊所意愛hit國的身分證抑是綠卡之類的文件，咱雖然kah伊無熟似mā替伊歡喜.。
新聞報導講，方芳真歡喜hō͘逐個看伊的中國公民身分證，透露伊是tī十一月二三申報，十二月二四領tio̍h身分證，而且宣告講：Ùi chit-má起，我kah逐個仝款，mā是有中國公民身分證的人ah！有台灣網友大聲喝講，方芳既然the̍h tio̍h中國公民身分證，應該kā台灣的健保卡剪掉bē使koh轉來台灣看病享受健保。方芳應講，無人有權利要求我剪掉台灣健保卡！方芳講話那會hiah大聲咧？有目睭khah利的網友看出方芳the̍h hō͘人看hit張m̄是「中華人民共和國居民身份證」、簡稱「中國公民身份證」，是kah黃安in hit種人仝款the̍h的是「中華人民共和國台灣居民居住證」、簡稱「台胞居住證」，不管時猶會tàng轉來台灣使用健保卡看病。方芳若真正beh the̍h tio̍h「中國公民身份證」，tio̍h愛親像另外一位藝人千百惠按呢，先放棄台灣國籍，才會tàng the̍h tio̍h「中國公民身份證」，親像方芳按呢無失去台灣國籍，當然猶會tàng轉來台灣享用健保卡。
今年一月初，方芳接受中國中央電視台《看台海》節目主持人訪問，伊講，台灣是我佇hia出世生長的所在，講對hit塊水土無感情是無負責任、是騙人的。台灣猶有真濟疼惜我的朋友。聽起來那像對台灣猶有真深的感情。騙人的！伊講tio̍h台灣的時，伊講身為中國公民，beh講一句話，咱管教囝仔的方法，囝仔若講道理，tio̍h會使kā聽，囝仔若無講道理，有時陣真正tio̍h kā煽兩下嘴phóe，伊才會知影厲害。所以我真正非常期待看tio̍h兩岸統一hit一工。
方芳敢m̄知影，中國若出手搧台灣兩下嘴phóe，有可能是向台灣拍幾粒飛彈、mā有可能戰機來台灣空襲幾遍，厝宅家園毀壞，人民慘死受傷。銃子無生目睭，m̄-nā方芳討厭的台灣人受害，真有可能炸死一寡方芳嘴裡所講的「真濟疼惜我的朋友」；雖然佇台灣kah方芳仝款認同家己是「中國人」的到今年才chhun 2.8% niā-niā，mā猶有六十四萬四千外人。一定會有人死佇戰火中。方芳的良心已經去互中國狗咬去ah！
狗mā是有百百種，有忠心的狗、有無論啥人the̍h物件hō͘食tio̍h會搖尾的狗，mā有去咬飼伊大隻的主人hit種無人情狗，方芳算是chit種「惡犬」！