一月十九，台北市前市長、中國國民黨前副主席郝龍斌接受電台訪問的時，談起2022年台北市長選舉，郝龍斌主張中國國民黨應該「藍白合」，kah台灣民眾黨tī後屆台北市長選戰中合作，若是無，在野黨有可能兩黨攏tio̍h傷koh攏輸，2022年台北市長干單「藍白合（ha̍p）」才有機會選嬴。台北人笑講郝龍斌是「孝呆」有影是真的m̄是假的。第一，逐個攏知，現此時台北市長柯文哲是民眾黨主席，民眾黨當然是當今台北市的執政黨，啥人teh kah你中國國民黨在野黨咧！第二，伊講「藍白合」才有機會選嬴，到底伊是講啥人選嬴？若是講中國國民黨選嬴，你kā台灣民眾黨kah有可能代表台灣民眾黨出來競選台北市長的現任副市長黃珊珊囥佇叼位？若是講beh hō͘台灣民眾黨選嬴，中國國民黨kah人「藍白合」beh創啥？
記者問台北市長、民眾黨主席柯文哲，對郝龍斌的講話有啥看法？柯主席隨時kā刨（khau）削講：我看「藍綠合（ha̍p）」khah合（ha̍h）。記者問黃珊珊對郝龍斌提出「藍白合」的看法，黃珊珊面色無爽對一大堆記者講：「各位做代誌好boh、mài逐工佇hia講爽的。」
中國國民黨前副主席郝龍斌喝講tio̍h「藍白合」中國國民黨kah民眾黨合作才會贏。對chit點，資深媒體人蔡詩萍評論講，換一個方式來問，蔣萬安無抵抵比現任副市長黃珊珊khah優勢。Hō͘人感覺郝龍斌實在是「太老實、太單純。」蔡詩萍是一位足有修養的台灣人，會講人是太古意、真老實、太單純、真條直。Bē親像我chit款人會直接罵人「孝呆」、「愚戇」。
一個人若攏mài開嘴，無人知影伊偌戇。真正的孝呆驚人m̄知影伊戇，仝款的戇話會講了koh再講。
二月初十，中國國民黨前副主席郝龍斌佇電台廣播中，批評台灣民眾黨目前的實力是「成事不足敗事有餘」，而後去立法院參加中國國民黨團的公聽會時，進一步表示：民調真清楚顯示，蔣萬安是中國國民黨kah台灣民眾黨上蓋強的人選。黃珊珊行政歷練豐富，mā做過幾任市議員，是真強的人選，但是若照現在的選舉態勢來看，黃珊珊kah蔣萬安猶差一大節。
郝龍斌的意思是愛「藍白合」，既然beh愛人kah in合，應該加減講幾句仔好聽話m̄才tio̍h，那有chit-ê時陣講人台灣民眾黨的實力是「成事不足敗事有餘」，有影真白目。講「孝呆」，你可能聽khah有。
聽孝呆講chit款戇話，聽濟人會tòng戇去！