2014年九月十八，蘇格蘭辦過一遍獨立公投，公投題目是：蘇格蘭是m̄是應該成作一個獨立的國家？同意的有1,617,989票、佔44.70%，不同意的有2,001,926票、佔55.30%。獨立公投無過。支持蘇格蘭獨立的陣營希望會tàng有二次公投，蘇格蘭政府首長、首席部長斯透真（Nicola Sturgeon）女士提議，明年2023年十月十九舉辦蘇格蘭獨立公投。伊已經向英國首相章孫（Boris Johnson）致函，尋求伊的正式同意。斯透真部長表示，若是首相m̄同意，伊會提請最高法院針對蘇格蘭獨立公投是m̄是合法做出法律裁決。
獨立呼聲那會koh再出現？實際上蘇格蘭獨立的聲音一直m̄-bat消失過。2016年，英國全民公投贊成脫離歐盟，當時斯透真部長tio̍h隨時要求舉行第二遍蘇格蘭獨立公投，因為佇英國脫歐公投中，62%的蘇格蘭選民反對脫歐，干單38%選民贊成。支持獨立的人認為蘇格蘭的未來應該家己決定，無應該kah歸個聯合王國縛作一個。In認為蘇格蘭「hông脫歐」tio̍h是一個上好的例。
2021年五月初六，蘇格蘭議會選舉，蘇格蘭民族黨席位增加到64席，選前蘇格蘭民族黨kah綠黨有表示，若是佇議會選舉中贏tio̍h上濟選票，tio̍h beh 推出獨立公投計劃。選舉結果in真正佇蘇格蘭地方議會中佔多數席位。斯透真部長表示，地方議會選舉的勝利，koh加蘇格蘭多數選民反對脫歐，意思是講伊掌握tio̍h「強koh有力的選民授權」，主張舉行獨立公投誠有夠力。但是英國政府已經清楚表明，bē同意蘇格蘭koh再舉行獨立公投。設使最高法院裁決合法，tio̍h會使koh獨立公投。設使裁決認為不合法，伊講，蘇格蘭民族黨會佇後屆大選中提出蘇格蘭獨立的政見，hō͘後屆大選成作「實質上的獨立公投」。
咱替蘇格蘭人民歡喜，in活佇真正自由民主的所在，講beh獨立公投tio̍h會使獨立公投、無受恐嚇，獨立公投會過bē過，結果按怎攏tio̍h由全體蘇格蘭人民負責。特別愛注意一點，蘇格蘭到chit-má猶原是英國的一部分。
2005年三月十四，中華人民共和國訂一個《反分裂國家法》講是為tio̍h beh對付台灣獨立。今年六月初十，佇新加坡舉行的第19屆「香格里拉對話」中，中國國防部長魏鳳和表示，中國堅決粉碎任何「台獨」圖謀。伊重申「若有人大膽敢kā台灣分裂出去，阮一定會無惜代價kah伊相戰，一定戰到底。」借問一下，台灣自了m̄-bat kah中華人民共和國合做夥過，原本tio̍h m-bat合做夥的兩個國家，是beh按怎分裂出去咧？那像叫兩個無結婚的獨身仔bē使離婚，仝款無道理、仝款好笑。台灣beh獨立m̄獨立，kah中國tī tōa-tāi？