一年一遍台中大甲鎮瀾宮媽祖遶（jîu）境活動，四月初九暗，佇顏清標壓轎之下，媽祖鑾轎十分平和通過彰化民生地下道了後，無疑誤中華統一促進黨總裁「白狼」張安樂來到地了後，爆發幾仔波推捒衝突。現場棍仔、矸仔、罐仔、番薑水四界飛，甚至有人大膽堆捒彰化分局副分局長鍾振邦，警方最後佇現場掠6名不法份子，依妨害公務偵辦。四月初十早起記者問鎮瀾宮董事長顏清標對暴力事件的看法，伊無奈表示，媽祖是歡喜熱鬧，不是歡喜惹事。逐個tio̍h心平氣和來迎接媽祖。Chit-má疫情期間，所有工作人員攏真辛苦，天氣熱kah嘴掩一下仔tio̍h澹lok-lok，一下子tio̍h koh換一個。好好的事代誌hông舞kah按呢，實在真無好。
四月初十，彰化縣警察局長吳坤旭指出，統促黨佇chit遍鎷祖遶境期間完全無kah警方接觸抑是申請，mā無列佇沿線接轎的名冊。初九暗八點半無預警出現，beh強勢搶轎。副分局長鐘振邦有倚去協調，向對方強調in無列佇接轎名冊，mā無出示鎮瀾宮所發的有編號的「疫苗3 OK卡」，而且in穿著政黨裌仔等因素，所以才無放行hō͘ in接轎。無疑誤白狼張安樂的客查某子李家葳大聲喊講：「全部的人攏過來！」一大陣人自按呢衝倚來，致使伊hông推捒拍tio̍h傷猶原忍痛壓制暴力。李家葳kah伊的翁婿吳金虎涉嫌喊衝、向警察唱聲，惹起推捒衝突，煞引爆近年來上蓋大規模的暴力衝突，造成副分局長等3名警察受傷。四月初十，檢警拘提李女夫婦到案，檢方認定李、吳兩人妨礙公務罪嫌重大，各處20萬、15萬元交保。
今年因為疫情關係，無管入廟祭拜、歇睏，攏io̍h憑「疫苗3 OK卡」出入，近距離接觸的扛轎koh khah免講。「疫苗3 OK卡」會使講是chit遍遶境的「通行證」，所有隨行陣頭、香客攏tio̍h以拍滿3劑的小黃卡換取chit張「疫苗3 OK卡」，有chit張就才會tàng自由進出宮廟祭拜。
彰化地檢署以涉嫌煽惑或教唆他人犯罪等罪嫌傳喚張安樂，四月十二下晡tio̍h向地檢署報到。張安樂到位了後，並無認為伊有率眾閙事，顚倒忿忿不平講，組織犯罪的是彰化警察分局長王國峯，警方若mài利用公權力組織犯罪，伊的部下那會有暴力發生咧？伊mā指控，hit工是因為警方全力動員阻止伊接轎，才會發生推捒，希望kā證物公開出來，看siáng是動武的。
真奇巧（kî-khá），白狼張安樂指控彰化警察分局長王國峯是「組織犯罪」。有影是台灣俗話所講的：賊khah惡人！