今年「六四天安門事件」33週年，台灣前總統馬英九佇面冊頂面發文呼籲中國當局tio̍h勇敢面對歷史、承擔責任，才會tàng向前邁進。馬英九指出，舊年十月，中國國家主席習近平佇中央人大工作會議的時有講tio̍h民主，習近平堅持國家一切權力屬於人民，最大限度保障人民當家作主、依法治國。奇怪，中華人民共和國憲法第二條講，中華人民共和國的一切權力屬於人民。第三十五條講中華人民共和國公民有言論、出版、集會、結社、游行、示威的自由。憲法寫的都攏做bē到，是按怎習近平講仝款的話，馬英九tio̍h認為che是對建立法治社會的正確方向。馬英九按呢敢無夠戇？
馬英九謳咾中國的民主行佇正確方向，猶無夠，tio̍h愛koh順續罵台灣伊才會爽。佇「六四」感言中，馬英九講，台灣雖然夯tio̍h民主大旗，但是佇民進黨政府執政下面，卻慢慢仔墮落入去「不自由的民主」內底。
五月初三，世界新聞自由日，「無國界記者組織」發布2022「世界新聞自由指數」，台灣排名ùi去年第43名升到今年第38名，赢過第43名的韓國kah第71名的日本，台灣是亞洲第一名。Che kah馬英九所講的，台灣慢慢仔墮落入去「不自由的民主」內底，抵抵顚倒反。馬英九所講的應該是指伊出世的香港，香港的新聞自由，ùi舊年第68名大跋到今年第148名，一年內跋八十名，是pho̍k一下墮落入去「不自由的民主」內底。今年全世界猶有28個國家的情況「足害的」，中國當然排佇內底，新聞自由，今年全世界180國內底中國是第175名，ùi尾溜算倒轉來第6名。馬英九那會無講半句話？
六月初四暗，馬英九辦公室罵民進黨政府講，連「真濟囝仔行去ah」chit種話都不准講的政府，看tio̍h無仝意見tio̍h扭曲抹紅的執政黨，猶有啥物面來講家己是自由民主咧？馬英九辦公室真正m̄知影，任何民主自由的國家，攏無造謠言的自由！？
作家、政治學者汪浩佇面冊頂面刨（khau）洗講：馬英九佇台灣「不自由的民主」中活kah chiah呢痛苦，不如移民北京，做一個中國政協副主席，佇習近平的領導下，終身擔任黨kah國家領導人，享受全民民主，自按呢過tio̍h快樂自由的生活。汪浩koh用「利」kā誘拐馬英九講：中國政協副主席的待遇比台灣前總統的禮遇koh khah好O͘！
馬英九前總統若是恬恬無講話，無人會講伊是啞口。伊何mih苦按[呢反（péng）烏做白，家己捧屎抹面咧？