十月二三，台中第二選區，也就是沙鹿、烏日、大肚、龍井、霧峰五區的選民舉行「罷免立委陳柏惟（Tân pek-î）投票」五區選舉人數是29萬4,976人，罷免通過的戶碇是四分之一，也就是7萬3,744票，而且，同意票tio̍h比不同意票khah濟才有準算。真難得投票率超過51.72%。到下晡七點所得tio̍h的結果，同意票7萬7,899票，有hāⁿ過罷免的戶碇，而且比不同意票7萬3,433票有khah濟。所以罷免通過。
Chit遍的罷免會使講是一場大壓細、強拍弱、惡欺善，完全無公平的罷免。一個世界上大黨、有9,500萬個黨員的中國共產黨，kah台灣第一大在野黨、佇立法院有38席的中國國民黨鬥孔，beh kā立法院上細黨、干單有一個立法委員的台灣基進立法委員陳柏惟（Tân pek-î）罷免掉，koh再配合地方勢力真強的顏家舞chit齣罷免案。
Chit三方面有無仝款的想法kah拍算。九月二六，中國共產黨總書記習近平發hō͘朱立倫當選黨主席的賀電，除了kah以往仝款：堅持「九二共識」、反對「台獨」的共同政治基礎上的良性互動，加強合作以外，今年kah永年無仝的「聖旨」是：「為國家謀統一」。習近平驚朱立倫bē記得，特別tī朱立倫就任黨主席hit工，佇《中央電視台》由中國社科院台灣砳究所副研究員陳桂清下指導棋，特別提醒朱立倫的四支箭，有一支是罷免陳柏惟（Tân pek-î），有一支是罷免林昶佐，有一支是年底的四大公投，定位作「倒閣公投」，hō͘現在民進黨執政的行政團隊一個強力的打擊。
歷史上得票率上低當選中國國民黨主席的朱立倫，緊beh佇罷免陳柏惟（Tân pek-î）chit案立威，koh khah要緊是，罷免有成koh會tàng向北京請功，kā佇立法院上堅持台灣獨立的台灣基進唯一的立委罷免掉，請記嘍囉一大功。
顏家的想法真簡單，看陳柏惟（Tân pek-î）一年十個月做立法委員做了太好，等待伊一任做了，後一任立委完全免想beh選贏，趁伊一任猶未做完，繋kā罷免掉tio̍h會tàng安心仔睏。
中國國民黨tio̍h出惡劣的步數，無管是造謠、抹烏、損害人格，chhōe無罷免的理由tio̍h製造一寡「藉口」，做一大堆看板寫「罪狀」。所以人才會講che是一場的「惡罷」。Chit步若會通，中國共產黨免用一兵一卒，干單下一道一道的「聖旨」，台灣的嘍囉tio̍h會tàng kā台灣舞kah烏天暗地、不得安寧。
Chit遍惡罷成功，台灣人那會使無覺醒！