一月十三是前總統蔣經國作忌的日，透早前總統馬英九tio̍h拼去桃園大溪謁陵。轉去了後佇伊的面冊頂面寫文章大大謳咾蔣經國對台灣的貢獻，借古早代誌來罵chit-má，批評今仔日台灣新威權主義興起，黨意kauh壓過民意。
馬英九表示講，因為意識形態，區域經貿整合受阻礙，臺灣的競爭力一直hông邊緣化。馬英九煞bē記得kā蔣經國講，台灣成功抵擋武漢肺炎疫情，是2020年順利維持經濟成長的少數國家之一，台灣koh一遍成作世界上成長上緊的經濟體之一。2020年台灣的GDP雖然干單成長約2％，但是已經是全世界少數tī疫情衝擊下猶原會tàng維持經濟成長的經濟體。這mā是幾十年來台灣經濟成長第一遍超越中國。馬英九mā bē記得kā蔣經國講，伊兩遍競選總統的時攏向台灣人保證，伊若當選總統，台灣的股市會起到一萬點。無影。伊的助選大將一位部長事後講，he是一種選舉語言。無疑誤民進黨的蔡英文連任總統了後，台灣股市m̄-nā超過一萬點、萬一點、萬二點、超過一萬五千外點，講是伊蔡英文好運。
馬英九講，因為選舉操弄，兩岸關係空前惡化，臺灣安全受tio̍h威脅。馬英九煞bē記得1979年，美國kah中華人民共和國正式建立外交關係了後，蔣經國主政的中華民國政府kah中國國民黨，對中國共產黨所採取的政策是:不接觸、不談判、不妥協的「三不政策」。2015年十一月初七，台灣總統馬英九佇新加坡kah中華人民共和國主席、中國共產黨總書記習近平會談koh握手有81秒久。
馬英九koh講，今仔日臺灣雖然已經民主化三十三年，直選總統已經七遍，卻佇執政者的帶頭之下，掀起一股反民主的逆流。到底民進黨政府按怎反民主，mā講一個來聽。咱干單知影，民主tio̍h是人民作主人。Chit-má 的民主無親像蔣經國執政下的民主，會派烏道的去美國暗殺台灣作家江南，一個學者陳文成轉來故鄉台灣hō͘警總叫去問話，路尾tio̍h m̄知按怎死去。Chit-má的民主無hit號烏名單，任何台灣人攏會使自由出國入國。
馬英九koh講，因為選舉操弄，兩岸關係空前惡化，臺灣安全受tio̍h威脅。借問一下，逐工是中國軍機飛來侵犯咱台灣西南防空識別區（ADIZ），抑是咱的軍機逐工飛去侵犯中國防空識別區？那會無好好kā蔣經國講清楚？
馬英九批評今仔日台灣新威權主義興起。明明是踏tio̍h蔣經國的疼腳，你講新威權主義興起，你講啥人是舊威權？真正m̄̄驚蔣經國peh 起來khiak 你的頭 殼？若是kah老牌老字號的威權蔣經國比起來，蔡英文算作啥物新威權，按呢亂講m̄驚笑破人的嘴？馬英九teh kā蔣經國哭chhan啥？ (210115)