十二月初九，美國國務卿龐皮歐（Mike Pompeo）佇招志亞理工學院（Georgia Institute of Technology），發表演講，以「中國對美國國安kah學術自由所帶來的挑戰」作講題，講真濟美國大專院校hō͘中國收買去，ùi 2013年以來至少有the̍h過美金13億（差不多新台幣374億），che是干單目前已經知的部分，實際上猶有真濟學校並無報告正確的金額。佇中共一直滲透下，一寡大專院校因為the̍h中國的錢手軟，真驚會去沖犯tio̍h中國，致使佇美國校園時常出現m̄敢出聲kah言論審查的現象，龐皮歐直剖講，無應該允准中共kā「政治正確」當作武器，來攻擊美國的自由價值、koh kā美國人民洗腦。
龐皮歐舉例，像講麻省理工學院“MIT”tio̍h無愛邀請伊去發表kah中國挑戰相關的演講，伊講“MIT”校長麗夫（Rafael Reif）bat暗示過，龐皮歐的發言有可能會沖犯tio̍h校內的中國留學生kah教授。但是龐皮歐強調無應該屈從佇所謂的「傷害中國人民感情」的講法，因為che只不過是hō͘中國kā「政治正確」當作武器。伊認為美國人應該警覺，中共是按怎毒害美國的高等教育機構，損害美國的自由kah國家安全等等的價值，無應該hō͘暴虐政權偷the̍h美國財產、koh kā美國人民洗腦，mā bē-tàng hō͘中共損壞美國的學術自由。對中共的滲透行為應該採取嚴厲的行動來反制，學術界mā應該拒絕中共的金錢誘惑。
事實上，五月初四tio̍h有福斯（Virginia Foxx）、呂卡斯（Frank Lucas）等七位共和黨籍美國聯邦眾議員，宣布beh調查中國對美國大學的滲透，而且聯名寫批hō͘教育部長戴福斯（Betsy DeVos），希望會tàng koh khah深入了解外國勢力滲透kah投資美國高等教育的深度kah闊度，而且要求教育部tī四月十一提供所有受調查學校的資訊kah通聯紀錄，tī本禮拜內舉行簡報。
2002年，中國成立「孔子學院」講是beh增進世界人民對中國語言kah文化的了解，發展中國kah外國的友好關係，促進世界多元文化的發展，為tio̍h建構和諧世界貢獻家己的力量。2004年11月17日，美國馬里蘭大學建立北美洲第一間孔子學院，全世界各國攏親像春天落雨了的筍仔四界puh出來。美國國務卿龐皮歐當然足清楚「孔子學院」對美國國家安全有偌大的威脅，kah chiah-ê學術機構中招聘間諜kah通敵者所帶來的風險有偌驚人，全世界的「孔子學院」相續關門。今年十月十五，龐皮歐講，中共利用「孔子學院」滲透美國教育體系，威脅愈來愈嚴重，伊要求所有佇美國的「孔子學院」tī今年年底以前攏總關掉。
好得美國有覺醒，若無，中國會kā美國舞kah根爛爛去！