二月二四俄羅入侵烏克蘭，經過一個月了後，全世界有兩種聲音攏對中國來。一種是希望停戰的聲音，攏講beh勸俄羅浮丁總統停戰，干單中國國家主席習近平有法nā-niā，因為中國是俄羅上好的朋友。Mā是因為按呢，所以另外一種聲音猶原向中國來，煩惱中國會出手軍事援助俄羅。

　無管叼一種想法的人，攏是無瞭解中國kah習近平主席。兩隻馬teh相踢，那有hiah戇的人走去作公親的？明明看俄羅佇烏克蘭的戰事已經陷入進無步、退無路的湳田，若出面作公親勸俄羅浮丁總統好收兵，雖然是出佇好意beh hō͘浮丁好落樓梯。但是所有的獨裁者攏自信滿滿，那有可能聽別人的話？

　　煩惱中國會去軍援俄羅的當然mā是戇人。三月二九，烏克蘭國防公布俄羅軍上蓋新的戰損統計：Ùi二月二四俄羅軍入侵到三月二九早時六點為止，俄羅軍大約陣亡1萬7,200人，烏克蘭軍摧毀俄羅軍597台戰車、1,710台裝甲車、303門火砲系統、96台多管火箭車、54組防空系統、127台軍機、129隻直升機、1,178台各式車輛、7台艦艇、73台油罐車、71隻無人機、21個特殊設備kah 4個戰術飛彈載具。到三月二八為止，俄羅入侵烏克蘭戰爭至少失去七名高級將領kah 16名高級指揮官。繼續按呢koh戰兩個月、三個月，世界第二大軍事國、koh有世界上濟核子武器的俄羅會變作啥款？中國當然足愛看。

　　為tio̍h幫贊烏克蘭，美國chhōa頭的「北約」國家大力軍援烏克蘭：美國總統拜登相續宣布提供烏克蘭價值10億美金的軍援，koh宣布對烏克蘭增加100隻「彈簧刀」（Kamikaze神風）小型無人機。歐洲理事會提供額外的3億歐元預算，koh beh提供烏克蘭所需要的防衛軍備。德國贈送1,500粒「箭式」防空飛彈kah 100枝MG3機銃。捷克贈送價值760萬歐元的武器，斯洛瓦克贈送價值260萬歐元的武器kah 640萬歐元的其他物資，法國捐贈3.5億歐元的防禦性武器，荷蘭贈送200粒帶咧行的「刺針」防空發彈、雷達系統、掃雷機器人；愛沙尼亞贈送標鎗式反坦克飛彈kah醫療設備。北約國家一直支援，俄羅kah烏克蘭北約國家愈戰愈熱，兩旁所燒掉的錢當然愈來愈濟，上好是兩旁攏拍kah淒慘落魄。戰場離中國遠遠，完全bē受傷害損失。嘴唇皮人情中國會出得，軍事援助俄羅？免講。美國拜登總統kah中國習近平主席視訊會議，拜登特別吩咐中國絕對bē使軍援俄羅，若違反會受tio̍h嚴勵的制裁。那像天賜chiah好的藉口，害習近平歡喜kah bē睏得，連眠夢mā會微微仔笑。

    中國徛懸山看馬相踢，有巧！