八月十五，高雄市長補選，三腳tu的兩腳，中國國民黨提名的李眉蓁、kah民眾黨提名的吳益政落選。落選記者會上蓋需要黨主席出面，中國國民黨主席江啟臣有chhōa一陣人來；但是硬kâng giú來民眾黨作市長候選人的黨主席柯文哲卻無看tio̍h人。Chiah呢要緊的時刻，民眾黨主席柯文哲人咧？

聽講是佇台中市和平區teh替區長補選候選人張瑞紘助選。院轄市的區長攏是官派的，是按怎tio̍h補選？原來照《地方制度法》，和平區chit-ê原住民區，是有公法人地位的地方自治團體，享有kah一般鄉鎮市仝款的地方自治權利，kah臺中市其他市轄區無相仝。和平區是台中市上東平的一區，kah宜蘭縣大同鄉、花蓮縣秀林鄉相接，人口一萬人。因為前區長林建堂牽涉準收受賄賂罪kah背信罪，hō͘公懲會撤職並停止任用一年。選委會預定八月二二進行補選區長。

　　柯文哲黨主席那會按呢？民進黨立委賴品妤罵講，直轄市長補選失敗，柯主席無陪候選人承擔責任，顚倒走去台中市助選。賴品妤立委問講柯主席那會是chit種人？真正是「刻薄寡恩（khek-po̍k kóaⁿ-un）無地比」。

　　真濟人叫台北市長柯文哲「阿伯」，伊假那mā無棄嫌，時間一下久，講「阿伯」人tio̍h知影是teh講柯文哲。第二工tio̍h有人滾笑，kā「刻薄」兩字的華語發音改作「柯伯寡恩」唸華語落去流傳。柯文哲主席邊仔的蔡璧如kah吳怡萱兩個人批評講，賴品妤m̄知小黨的處境kah歹做。借問咧，一個黨主席的刻薄寡恩，kah黨的大細有啥關係？無，一點仔關係都無。是hit-ê人的本性kah品格。

　　咱看五、六年來，台北市長柯文哲按怎用人，伊的局處長按怎離開？離開了柯市長講過啥款的話，真正會hông凊心、聽了會hông起畏寒。

　　八月十八新聞報導，台北市政府允准捷運信義安和聯合開發案建商免開道路的義務，舊年十一月，台北市長柯文哲hō͘民進黨台北市議員簡舒培質疑清廉破功。今年一月柯市長指示相關單位kā全案移送法辦，隔七個月了後的今仔日，有媒體報導講：柯文哲市長移送當時擔任副市長的陳景峻，確實會hông驚一tiô。陳景峻敢m̄是hit-ê為柯市府拚kah無暝無日，為柯市府作牛作馬，甚至hō͘民進黨支持者罵kah臭頭hit-ê民進黨員副市長嗎？柯文哲市長連任了無koh重用陳景峻，啥物緣故咱m̄知。可能佇柯市長的心肝底想講，我無koh器重的人，合該tio̍h悽慘落魄、佇台灣行無路，那會hō͘蔡英文總統提名作監察委員？真正是豈有此理！無拍一枝hō͘ kàu那會使得！

　　「柯伯寡恩」，若有人m̄知啥意思，請參考柯文哲按怎凌遲陳景峻的故事。