二月二四，俄羅大軍侵入攻打隔壁國烏克蘭，各國政府kah人民紛紛對俄羅發聲譴責甚至進行制裁，無幾工陸續有真濟國際組織、學者、運動員對俄羅進行抵制；另一方面對烏克蘭發出聲援kah物資甚至武器的援助。
二月二六，南京大學教授孫江以「江門直言」名義，佇中國社交媒體「微信」頂面發表一篇「俄羅對烏克蘭的入侵kah阮的態度」，內容批評俄羅身為一個聯合國常任理事國、koh是一個有核子武器的大國，竟然對弱小的兄弟之邦出手kā拍。無論俄羅有千條理由，萬般借口，用武力入侵一個主權獨立的國家，tio̍h是對用聯合國憲章作基礎的國際關係凖則的踐（thún）踏，是對現有國際安全體系的破壞。包含北京大學教授王立新、香港大學教授徐國琦、北京清華大學教授仲偉民、復旦大學教授陳雁等知名歷史學者mā做夥倡議，強烈反對俄羅對烏克蘭發動戰爭，堅決支持烏克蘭人民保家衛國的行動，強烈呼籲俄羅政府kah浮丁總統停止戰爭，tio̍h用談判解決糾紛。
Chit篇文章發表了後，隨時佇「微博」、「微信」頂面遭受tio̍h一大陣「五毛」圍剿（châu），批判chiah-ê學者「違背國家立場」、「教育界的恥辱」、「五鼠鬧中華」，koh khah厲害的是有網友講伊已經向有關當局舉報。續落去的是「江門直言」所有的文章攏總hông清除了了，而且kā孫江的名刣掉去。幾點鐘後hit篇文tio̍h遭受中國網絡的封鎖。香港大學歷史學教授徐國琦是其中一位簽署者，伊佇BBC中文的訪問中直剖指出，「侵略tio̍h是侵略，bē使按呢顚倒是非。」In五位教授真正是「中國歷史學家的驕傲」。
出世身軀tio̍h無好勢，行路搖搖擺擺、講話無真清楚、四十歲的女詩人余秀華tī俄羅入侵烏克蘭的第三工，寫一篇《祈禱辭》講：我祈求詩歌會tàng阻擋一台戰車／含tio̍h目屎的詩歌會tàng阻擋koh khah濟／我祈求súi花會tàng對抗銃子／一把康乃馨會tàng安慰一位母親／我祈求hiah-ê囝仔，hiah-ê囝仔ah／會tàng佇街路走蹤thit-thô／我祈求和平！／我祈求hiah-ê夯銃鬥銃尾刀的對敵者／kā對方講出恁家己母親的名，某子的名／我祈求每一個發起侵略戰爭的人／珍惜家己的名譽／診惜每一個戰士的生命／珍惜每一個平民的生命／我祈求佇已經多災多難的地球頂面／日頭普照／無比戰爭koh khah邪惡的代誌／無比戰爭koh khah低級的侵略／我祈求和平！余秀華女士隨時接tio̍h一大堆人的侮辱kah亂罵。
M̄是中國人的良心攏hō͘狗咬去，是真濟猶有良心的中國人m̄敢出聲。
咱真歡喜聽tio̍h有良心koh有勇氣的中國人的聲音。