今年清明連假頭一工、四月初二早時九點28分發生臺灣鐵路局408次Taroko（太魯閣）號事故。佇花蓮縣秀林鄉的台鐵北迴線清水北口，載有492名旅客的Taroko自強號佇行到磅孔口的時，kah ùi邊坡kō落來侵入路線的工程車相cheng敗馬了後衝入磅孔內koh去lòng磅孔壁，初步認定有造成50人死亡kah 216人輕重傷的悲劇。聽tio̍h chit-ê不幸的消息，逐個to̍h心酸目眶紅。續落去，隨時想講beh按怎幫助過身去的人的家屬kah受輕重傷的旅客，第二工衛福部宣布捐款帳戶，四月三十為止接受民眾捐款，各基金會、銀行、機關團體、學校師生，各黨黨部、各級民意代表，各級行政主管，攏慷慨捐款。無三工tio̍h超過新台幣兩億，佇chia 咱tio̍h看出台灣人善良的本性。
善良tio̍h是好心：看人無食tio̍h假若家己teh枵餓，看人悲傷家己心會疼。而且隨時用行動來表達，捐錢kah出力去幫忙。1999年九月二一中部大地動，捐款超過新台幣一百四十外億。會記得咱「綠色和平廣播電台」除了佇節目中呼籲逐個捐救災應急的物資以外，發起捐米kah現金而且呼召總舖大師二師kah助手，去災區的東勢高工煮三頓hō͘災民食，一直煮三個月久。咱當然感謝所有出錢出力幫忙的人。Che tio̍h是咱台灣人可愛的所在。
2008年五月十二，中國四川汶川大地動，台灣的政府、企業、民間社團kah各界民眾捐錢hō͘四川災區有新台幣七十億五千外萬，約人民幣十五億兩千外萬。中共官方所發起的「送溫暖獻愛心」活動，佇十五個省所捐的錢將近人民幣七千兩百外萬，咱比in加二十外倍。
2011年三月十一，日本東北地方發生近海大地震動，咱台灣隨時派遣救難隊去日本以外，臺灣政府kah人民捐款新台幣七十外億、約日幣200億，是世界第一濟，而且超過有捐款的其他93個國家的總額，另外由台灣寄出去的救援物資mā超過一千公噸。日本政府、傳播媒體kah日本人民，到今年十周年紀念，猶思思念念感謝台灣。咱做好代，m̄是teh等待人感謝抑是報答，但是咱mā無希望受咱幫忙過的中國，三不五時軍艦駛來恐嚇咱、逐工軍機飛來擾亂咱。In按呢恩將仇報，敢會使算是「人」，敢會使算是「正常的人」？
最近聯合國公佈世界快樂的國家，今年咱台灣排佇第十九名，是亞洲第二名、東亞第一名。評比的內容有六項：國民所得，政府的清廉無貪污，預期的健康壽命，人生選擇的自由，社會救助（有困難的時有人會幫助你bò），有慷慨幫助別人bò。咱台灣人tio̍h是好心愛幫助別人，才會chiah呢快樂！