十二月初六，美國白宮針對明年beh佇北京舉行的冬季奧運會。宣佈beh採取外交抵制，也tio̍h是無派任何外交抑是官方代表參加，但是美國冬奧代表隊的選手、教練團等攏會照常參加。Chit-ê行動是因為中國佇新疆持續進行種族滅絕kah反人類罪行。美國是夯Olympic精神第二kah第六點所提的「維護人性尊嚴kah人權」chit枝大旗teh講話。中國外交部發言人趙立堅講，中方對美方的舉動表示「強烈不滿、堅決反對，已經向美方提出嚴正交涉，美方若是一人犯眾人，中方一定會採取堅決反制的措施。」
美國開出第一銃了後，「五眼聯盟」國家—紐西蘭、澳洲、加拿大、英國攏總tòe美國的腳步，beh採取外交抵制北京冬奧。第一個出聲的是紐西蘭，表示bē派官員出席，干單強調kah疫情考量有關。足好笑的是，中國官方煞講：「根本無邀請恁來！」罵講chiah-ê國家是teh政治炒作、自作多情。甚至官報《環球時報》總編輯胡錫進起屁面講：美國宣布官員攏無beh出席北京冬奧會，哈哈，中國人講，咱敢有稀罕in來？
抵制奧運會分作三級，上嚴重的是全面抵制，像1980年蘇聯佇莫科舉辦的夏季奧運會，美國tio̍h是拒絕派出運動員參賽，以抗議蘇聯入侵阿富汗。第二級是經濟抵制，雖然有派運動員參賽，但是無beh kah主辦國的商業機構進行合作，mā無轉播主辦國的電視台節目。上蓋輕的tio̍h是美國chit遍採取的外交抵制。美國政府的考量是，奧運會每四年才辦一遍，真濟運動員佇伊的生涯內干單有極少的機會會tàng參與奧運會。不准運動員參加m̄-nā會kā原本有可能得tio̍h獎牌的機會白白讓hō͘別國的運動員，政府mā真有可能hông罵講是違背運動精神，政治干預運動。因為是上輕的抵制，莫怪美國前國務卿Phông-phé-o（Mike Pompeo）會罵講chit種抵制亦bē疼亦bē chiūⁿ，顚倒是家己失去立場。干單『外交抵制』根本無夠力！中共政權那有teh驚你啥物外交抵制，因為到路尾比賽猶原是照常進行，北京仝款會使家己講是萬邦來朝、照常主導勝利。拜登應該硬（ngē）起來，正面kah中共奧運對削！抵制北京冬奧。
中國m̄-nā有兩千外粒飛彈裝向台灣，無放棄武力解放台灣，台灣人李明哲去中國隨時失踨、hông掠去判刑關監，罪名是伊佇台灣犯顛覆（中國）國家政權罪，中國隨便講咱的行政院長蘇貞昌、立法院長游錫堃、外交部長吳釗燮是「台獨頑固分子」，而且唱聲beh對in三個人採取「懲戒」措施。解放軍軍機逐工飛來咱的飛航識別區擾亂。Beh按怎抵制北京冬奧，咱府敢會使無出聲？
奧林匹克主義精神第二及第六點提及維護人性尊嚴和人權，不做任何歧視和差別待遇，但是中共獨裁行徑對西藏、新疆及中國境內維權律師的侵害，對人權運動和香港的侵害，以及對台灣的威脅，基本上皆與奧運精神背道而馳相牴觸，