Ùi 2018年四月十六開始，台北捷運公司推出一種1,280元食kah飽的月票，tio̍h是講買一張月票，一個月內，無論是坐雙北公車抑是台北捷運，無限次數出在你坐，會使講是bē少通勤族的福音。
今年七月初九新聞報導，台北市長柯文哲前幾工佇交通會報舉出，有民眾使用月票坐超過3,000元，甚至有人坐到超過一萬元，hō͘伊相當bē-tàng了解。「到底是何方神聖」，而且講tio̍h愛查使用者的行動腳跡，意思是講tio̍h查chit種人到底ùi叼位去叼位轉去叼位，按怎坐公車轉捷運才koh轉公車轉捷運，按怎會坐超過3,000元以上，甚至有人坐到超過一萬元？
差不多最近四、五十年來，全世界才開始流行各種「食kah飽」的推銷活動。四十幾年前，有一遍去日本，四界攏會看tioh「食放題」、「飲放題」的紅布條，好奇問日本朋友he是啥意思？日本朋友解說「放題」chit兩字漢字讀作「hō-dái」，意思是講「食，出在你食，飲，hō͘你飲透海。」Chit種頭起先是ùi西洋式的自助餐（Buffet）開始的，英文講作“All you can eat.”意思是你會tàng食偌濟隨在你食無問題。趣味的是西洋式自助餐日文竟然叫作「バイキングbai-king料理」，
「バイキング」tio̍h是講北歐“Viking”維京族的食法。有的餐廳講的「飲放題」是指一般果汁清涼飲料，所以有的餐廳特別喝出「bì-lù飲放題」。
台北市公共運輸處初步指出，坐月票破萬元的攏是仝一個人使用，而且每日次數懸到三十幾遍以上，一個月有坐超過1,000遍，使用者的行動腳跡、時間，攏是連續性的，並無違反1,280元月票的使用規定。所以bē去chhōe當事者來問。公運處mā講，準講是宅配抑是外送員使用chit種月票mā無算違規。以後是m̄是會小可調整規則，等待市政府討論。
Beh討論啥？規則有啥thang討論？君子講出tio̍h是話。政府kah人民訂的契約，當然tio̍h照呼照行，那會使隨便改？
若是有一間西式自助餐餐廳總經理，敢懷疑叼一個人客那會食十盤八盤菜猶teh食，而且講出嘴叫經理查看是「何方神聖」。Chit間餐廳按算beh倒店ah！
柯文哲市長m̄-bat聽過「敢開飯店m̄驚人大食」chit句台灣俗語話是boh？枉費伊家己講是台灣人！He是伊柯市長個人的常識問題。
但是台北捷運公司推出1,280元食kah飽的月票，人按怎坐、一工beh坐幾十遍，是買月票人的權利。柯文哲市長管hiah濟？M̄是干單hông罵愛管閒仔事niā-niā，伊會成作一個無想beh守信用的市長，一個無beh照呼照行的小人！