舊曆過年愈徛近，若想tio̍h中國的「春運」，實在會hông煩惱。中國的「春運」意思是中國「春節期間的交通運輸」，也tio̍h是舊曆過年前後發生的一種大規模的、交通運輸高壓力的、塞車塞人的現象，一般發生tī春節前15工kah節後25工左右，tī chit-ê期間，民眾轉去故鄉kah外出活動增加，全國旅客數量一直升懸，探親流、學生流、民工流、旅遊流，各種流重重疊疊，出現交通挨kheh的現象。「春運」會使講是「全球罕見的人口流動現象」，mā hông號作「地表上大規模的人口遷徙」。
為tio̍h beh轉到厝，真濟人tio̍h一直改換交通工具，ùi飛機、火車、大巴士、渡船、小巴到o-tó-bái，真正反映出「春運」的艱難辛苦：票oh買，車oh坐，人不安！像講2018 年的「春運」，全中國旅客發送量差不多有二九億七千八百萬人次。
今年中國國務院為tio̍h應對新型冠狀病毒病（咱講的武漢肺炎）感染疫情聯防聯控機制綜合組，十二月底tio̍h提出，鼓勵企事業單位靈活安排休假，引導職工群眾tī春節期間盡量留佇工作地點休假。北京市政府舊年底tio̍h chhōa頭呼籲：「非必要mài出京、非必要mài出境」，提倡目前佇北京的中國民眾今年春節留佇北京過年，上海、深圳mā攏按呢呼籲。目前已經有包括安徽、四川、湖南等幾個勞動力輸出大省，最近mā攏一直發布通知，要求「非必要mài轉來故鄉」。為tio̍h hō͘ khah濟人就地過一個好年，各地政府kah企業有的發紅包，有的加補貼，有的發消費券，有的發「留守獎金」。各地台辦公開呼籲，在地臺胞留佇在地過年有各種獎勵。
無管佇叼一國的台商、台灣留學生、抑是食頭路、做工課的台灣人，今年過年非必要 mài搬搬搖搖，上好是留佇原本徛起的所在。事實上有真濟武漢肺炎的患者是無任何症頭的，in傳染散播病毒的威力bē輸有症頭的患者，真正是「武漢肺炎病毒tio̍h佇你的身邊」！無徙動tio̍h減少傳染散播病菌的機會。
今年會轉來台灣過年的中國台商，雖然無永年十萬八萬hiah濟，但是照預估至少mā有成萬人。機場檢疫tio̍h是一大工程，轉來的人tio̍h koh有十四工的居家檢疫，若有少數人無遵守防疫規矩、pha-pha走，當然會增加疫情擴散的可能kah防疫人員的工作量，拜託轉來過年的同胞tio̍h盡量配合。
海外疫情緊張，上好是mài烏白徙動。已經轉來故鄉過年的，tio̍h愛有疼惜台灣的心，hō͘台灣會tàng一直是一個清氣koh安全的寶島。