2021年一月二十早起（台灣時間二一透早）佇美國首都Wasinton特區美國國會大廈邊舉行第46任美國總統Biden的就職典禮。咱國駐美國代表蕭美琴受邀請參加。Che是1979年台美斷交以來咱國外交官頭一遍得tio̍h美國總統就職典禮籌備委員會的正式邀請。中國國民黨立委陳玉珍講，參加美國總統就職今年m̄是第一遍。陳玉珍立委假仙m̄知影，過去台灣無論是大使抑是ùi台北去的「祝賀團」出席美國總統就職典禮，攏是透過美國國會議員提供、座位是一般民眾的觀眾席。陳玉珍立委koh講，2016年，美國前總統Trump有kah蔡英文總統通電話，參加就職只不過是kah以前的外交成就仝款，chit遍蔡英文總統無kah Biden總統通電話算是無及格。
台灣時間一月二十下晡，中國國民黨立委馬文君佇伊的面冊頂面酸咱政府講，早前傷過thīn美國總統Trump，chit遍台灣beh參加美國總統就職典禮「門都沒有」，意思是講免siàu想、是無可能的代誌。台灣時間二一透早，駐美代表蕭美琴佇伊的面冊頂面PO一張伊徛佇美國總統就職典禮會場前的相片。一時之間，馬文君立委的面冊hông灌piak去，有人kā講「門都沒有」人蕭美琴mā會tàng入去。中國國民黨立委陳以信講，外交部應檢討是按怎到最後一刻才hō͘咱國民知影，致使hō͘國民有真濟誤會。
中國國民黨立委賴士葆表示，蕭美琴得tio̍h邀請參加「當然是好代誌」，逐個攏真歡喜，值得全國人民肯定。但是按怎得tio̍h chit份邀請函？是透過私人關係？抑是美國beh愛台灣做啥物？除了食萊豬、買武器kah軍事用品以外,敢猶有啥物當teh進行中的？猶koh叫咱買啥物？蕭美珍琴代表一定tio̍h向全國人民好好說明。
針對馬文君面冊發文，中國國民黨煞hông質疑teh「唱衰」台美關係，中國國民黨主席江啟臣替伊講好話，強調中國國民黨長期以來的政策tio̍h是「親美和陸」，這政策無改變，但是國會議員的監督角色抑是對政府的推捒施壓，是國會議員看代誌有無仝的角度，整體來講猶原是希望看tio̍h台美關係真正實質深化，有實質互惠作為。
有「網紅」無法度肯定蕭美琴代表，烏白酸蕭美琴是佇草埔仔頂頭拍卡。立委王定宇二一暗專工佇面冊頂面PO參加Biden就職典的幾國大使拍卡相片，包括南韓大使、瑞典大使、澳洲大使等，攏kah蕭美琴佇仝一個地點拍卡。
你聽chit陣人按怎用小人的心想代誌、講代誌。