十月十九，中央流行疫情指揮中心澄清，佇國內種疫苗所the̍h tio̍h的黃色卡片干單提供國內種疫苗使用，佇國外種疫苗的人，tio̍h隨身帶國外種疫苗的卡片。當場有記者問講若是民眾「the̍h tio̍h大陸種疫苗證明，敢會使換發咱的黃色卡片？」副指揮官陳宗彥問講：「你是m̄是講有ùi中國轉來的民眾？因為你講大陸，我實在m̄知影叼一個國家lah！」中國一直無愛台灣人稱呼in中國，台灣人若稱呼in「中國」那像是外國人，叫台灣人tio̍h稱呼in「大陸」。Chit種稱呼實在足無常識，因為全世界的人若講tio̍h「大陸」，可能是講非洲大陸、歐洲大陸抑是北美洲大陸。全世界無一個國家的名叫作「大陸」。
無疑誤十月二七，中國國台辦佇例行記者會中，發言人馬曉光hông問起chit項代誌，伊回應講「我先beh問伊到底是啥物人？伊的祖先是啥物人？伊的家族ùi叼位來的？伊流的血是siáng的血？對chit種背祖叛（poān）宗的人，實在無值得評論。伊不過是為tio̍h求乞一官半職所表演的一場鬧劇而已ah！」
十月二七下晡，內政部次長兼中央流行疫情指揮中心副指揮官陳宗彥，佇家己的面冊發文講：我身上的血是ùi我的父母來的，感謝我的父母hō͘我有熱愛民主自由人權的基因，佇chit個海洋國家有真濟ùi世界各國的人來chia奮鬥拍拚，染色體裡有包容差異、尊重無仝、疼惜弱勢、協力互助的成分，我kah阮厝裡的人攏是台灣人，mā攏認為作台灣人真光榮。Chit塊土地頂面有流過真濟先輩的鮮血kah青春，in為tio̍h自由民主、公平正義的不屈服kah勇敢，tio̍h是台灣的印記，若是面對威迫kah欺壓，tio̍h屈服抑是驚惶軟懦才是背祖。我願意為tio̍h台灣不斷努力、持續拍拚，m̄是因為啥物血統，是因為認同。
自早福建、廣東的人生活困苦，不得已「過番」—去南洋討thàn，因為認真拍拼、辛苦粒積，幾代了後真濟攏變成小財主。In上大的缺點是過家己的生活，完全無認同生活的土地，經過幾代猶看無起當地人叫人是「番子」、bē愛學當地語言講he是「番話」，自認為懸人一等。不過，社會若發生動亂，tio̍h一定引起「反華」，搶、拍、刣華人。東南亞唯一無反華的國家是泰國，潮州人移民去hia，一代傳一代完全作到「入鄉問俗」，隨時改泰國名、學泰國話，kah泰國人過仝款的生活。歷史上有真濟位泰國總理kah各部部長有華人血統，但是in絕對bē講。幾年前有中國記者假gâu、愛展風神，報導一位出名的政治人物講伊的阿公是ùi中國潮州移民來的。引起當事人相當的不滿kah困擾。
陳宗彥問講：大陸是叼一國，到底是背啥物祖？叛啥物宗咧？