會記作囝仔的時，台灣猶佇白色恐怖統治之下，真濟學生囝仔作文寫到上尾，tio̍h那像鸚哥鳥干單學一句：想起苦難的大陸同胞。準若作文題目是「中秋節」，寫到賞月食月餅，想起苦難的大陸同胞，mā假那有影咧：有的學生囝仔作文題目是「遠足」，寫到尾仔講今仔日遠足真歡喜，伊mā寫講：想起苦難的大陸同胞，bē使笑伊是「天才」，實在是中國國民黨的奴化教育，kā好好一個學生囝仔教kah變作那像鸚哥鳥，干單學一句：想起苦難的大陸同胞。
無疑誤到今仔日猶有人留tio̍h chit種鸚哥鳥的病毒，無管啥物主題，伊一定會講：「中央欠疫苗。」
六月初四起一禮拜久，中國國民黨立委黨團等十個人手the̍h一塊牌仔，頂面寫：「我愛疫苗，台灣愛活命」，每工佇總統府頭前遊行抗議。因為hit當時咱政府家己買的kah日本贈送咱的，各種疫苗鬥鬥一下才兩百十幾萬劑niā-niā。In的用意m̄是干單抗議「中央欠疫苗」。等到七月中旬，咱家己買的kah日本、美國贈送咱的各種疫苗已經有七百三十幾萬劑，中國國民黨中央猶beh chhōa in執政的四個縣，吵講beh買疫苗，koh講「中央欠疫苗」的理由無啥會通以外，hō͘人iah講hit四個縣注疫苗的進度攏排佇尾仔幾名，有兩個縣緊講in無beh家己買疫苗ah。其實咱家己早前tio̍h訂買kah人送的疫苗有三千外萬劑。
七月十八，台北市長柯文哲講beh借債80億家己買疫苗，伊講因為中央欠疫苗。台北市議員簡舒培表示，根據111年度台北市總預算案編製日程表，台北市明年度的預算編製程序tī七月底以前tio̍h差不多告一段落ah，柯文哲市長chit-má提起明年beh借債根本是teh講古。
上好笑的是新北市副市長劉和然。根據衛生福利部統計資料，到七月二十早時十點為止，AZ疫苗新北市猶chhun有將近20萬劑，是全國chhun上濟的縣市，劉和然副市長講，疫苗的配送主導權佇中央，中央beh配送偌濟疫苗，地方干單會tàng被動接受。那會造成chit種現象？因為「中央疫苗不足」。對chit點，新北市議員戴瑋姍透過面冊表示，劉副市長到底teh講啥hō͘人攏聽無。戴議員koh kā伊刨洗（khau-sé）講伊「是應該重修國文，抑是數學？」
其實，咱台灣早前已經訂買的、koh有高端kah聯亞兩間咱國產的疫苗，加上台灣民間台積電、鴻海/永齡基金會、慈濟贈送kah日本、美國、立陶宛、斯洛伐克贈送的，加起來有5,068萬劑各種疫苗，七月二二咱政府koh訂買3,600萬劑的Moderna疫苗，總共有8,668萬外劑疫苗，啥講「中央欠疫苗」？