台北市議會要求市政府編列重陽（tiâng-iâng）敬老金預算，柯文哲市長煩惱tio̍h借債致使留債hō͘子孫。中國國民黨台北市長參選人蔣萬安質疑按呢講是
對長輩的情緒勒索（le̍k-sek）。六月二六下晡，柯文哲市長出席民眾黨智庫論壇的時，反轉向蔣萬安唱聲：Beh選市長的人，上好是講hō͘清楚，錢beh ùi叼位徙來？抑是tio̍h去借債？阮台北市民beh問的是：柯市長，原本beh作阮重陽敬老金hiah-ê錢，你kā阮the̍h去叼？上好是講hō͘清楚。
全國九十歲以下的一般老人重陽無the̍h tio̍h半錢錢（póaⁿ sián-chîⁿ）的除了台北市，猶有屏東縣、花蓮縣、宜蘭縣，chit三縣自本tio̍h無，老人mā無啥話thang講。上大出手的是澎湖縣：65至79歲發5,000元 80至89歲發6,000元 90至99歲發8,000元。100歲以上發15,000元，干單桃園市發20,000元、kah新北市發10,000元加市長紅包10,000元，chit兩市贏伊niā-niā。
咱台北市實施重陽發敬老金制度，是ùi三十五年前的1987年開始的，ùi 1996年tio̍h維持「70歲以上長者每年1,000元」的制度。2013年四月，當時的台北市長郝龍斌宣布調整重陽敬老金發放標準，kā發放年齡ùi原本訂的70歲放寬改作65歲，發放金額mā ùi新台幣1,000元修懸到1,500元，而且kā發放年齡kah金額調作四級，調整後預算經費增加到6億2,700萬。奇怪的是，hit當時郝龍斌市長那會無哭哀按呢會留債hō͘子孫？
今仔日新北市有61萬長者重陽領tio̍h敬老金，也tio̍h是講每7位市民tio̍h有1位會tàng領tio̍h重陽敬老金，預計發出10億4千外萬，是六都的第一名。是按怎侯友宜市長無哭哀會留債hō͘子孫咧？。
2015年十月，為因應台北市2016年起beh kā重陽敬老金加排富條件，台北市長柯文哲表示，反對一次性的開錢，beh kā chiah-ê錢應用佇老人照護等久長建設，做一個負責任的政治家。2016年取消每年普發1,500元的重陽敬老金，kā錢轉作其他社會福利措施使用。
柯文哲市長講取消重陽敬老金，kā錢轉作其他社會福利措施使用。誠好聽。借問一下，台北市老人福利相關的預算逐年teh增加，但是長照服務、老人活動據點、老人福利佈點的預算攏總倒退lu；柯市長承諾的啥物「石頭湯計畫」、青銀共居、市有土地TOD長照開發等，ùi大力宣傳到無聲無說，成效佇叼位？承諾的日照中心設置數mā一直無達tio̍h目標。
柯文哲市長，阮的錢你kā阮the̍h去叼？ (220701)