二月二四，俄羅總統浮丁（Vladímir Pútin）發動俄羅軍隊侵略隔壁國烏克蘭，引起全世界大tio̍h驚kah大反感。除了真濟國政府一面對俄羅發出讉責一面對烏克蘭聲援kah物資上的援助，全世界各所在攏有平民百姓發起的反戰反浮丁的遊行示威。
二月二六，加拿大溫哥華有千外名無仝種族的人士佇市中心聲援烏克蘭人民，共同抵禦俄羅的侵略行為。二月二七，包括ùi瑞士、芬蘭、西班牙、英國各所在，陸續出現民眾上街頭遊行聲援烏克蘭、而且譴責俄羅軍的暴行。瑞士有數千人聚集佇聯合國日內瓦總部頭前，聲援烏克蘭。上濟人可能是佇德國柏林有10萬群眾上街頭聲援烏克蘭、抗議俄羅總統浮丁發動戰爭。
二月二四，俄羅入侵烏克蘭hit工，俄羅本國各城市有幾千幾萬民眾無管警察的威脅，行上街頭抗議國家軍隊發動戰爭，大聲喝「無愛，無愛戰爭！」真濟俄羅公民，kah世界各所在的人仝款，對浮丁下令對in的「兄弟國」進行全面攻擊，感覺失望、憤慨kah見笑。根據一個獨立的俄羅人權媒體公佈，到二月二四暗為止，俄羅警方有佇五十三個城市至少有掠1,702人，莫斯科kah聖彼得堡hông掠上濟人。根據《CNN》報導，浮丁無管國際制裁俄羅侵略烏克蘭，俄羅民眾四界大罵「浮丁起siáu ah」，幾十個城市攏有出現反戰示威，要求隨時停止軍事行動，還hō͘逐家和平。一個獨立的俄羅人權媒體表示，到二月二七暗為止，莫斯科當局已經拘留4,124個反戰示烕的人民，全國反戰抗議hông關押的民眾總數已經超過5,900人。
二月二六，有664名俄羅上傑出的學者公開連署，要求俄羅隨時終止對烏克蘭的戰爭。Chiah-ê學者表明，俄羅對烏克蘭動武造成大規模死傷，破壞聯合國的集體安全制度基礎，俄羅tio̍h為chit場「不義」戰爭負起全責。
佇聖彼得堡示威遊行的時，有一個人徛佇人行道頂面，夯一幅俄羅上出名的反戰畫作——韋列沙真的《戰爭的神化》的複製品，畫作是畫佇日頭足猛下面的土地頂面，有用敵人的頭殼碗疊起來的一個金字塔。Chit位十九世紀的畫家有佇畫框頂面寫講：Chit幅作品是beh獻hō͘「所有偉大的征服者，無論是過去、現在抑是未來的。」。
有一種獨裁者愛四邊的國家攏聽伊的話，若無順伊的意，伊tio̍h發動戰爭去kā拍kā刣，kā征服。Chit種「戰爭販仔」tī歷史上一定會留落人類殺手的罪名！歷史kā咱講：全世界的人攏愛和平，m̄是逐個人攏足愛戰爭相刣！